MITAHAN sa iyang kaugalingon ang kanhi sakop sa Philippine Air Force human nga nabuthan sa armas ang tiil sa iyang girlfriend sa dihang nag-inilogay sa armas atol sa ilang away.
Ang insidente nahitabo niadtong gabii sa Biyernes, Marso 14, 2025 sa Sitio White Road, Barangay Inayawan, Cebu City.
Base sa imbestigasyon sa ni PMSgt Benjamin Maglajor, Inayawan Police Station nga ang maong kanhi sundawo gitago sa pangala’ng Jacob, 33, samtang ang girlfriend nga 20 anyos, giila nga si Jill ug residente sa nahisgutang lugar.
Nasayran nga napungot ang kanhi sundawo ngadto sa uyab kay bisan og lawom nang gabii miadto kini balay sa silingan diin nagpuyo ang ex-boyfriend sa biktima.
Nitumaw ang init nga panaglalis ug gihudlat sa suspek ang gf sa dihang giwarawara niini ang iyang gidaladala nga armas ug giilog sa biktima.
Atol sa inilogay ang 357 revolver ang nibuto ug ang bala niigo sa wala nga bahin sa tiil sa maong biktima.
Ang suspek ra sab ang midala sa iyang uyab sa Cebu City Medical Center dayon mi-surrender sa Inayawan Police Station.
Kasong illegal possession of firearms ug kalapasan sa Comelec gun ban ang atubangan sa kanhi sundawo. / GPL