Nadakpan ang usa ka ex-convict nga nalakip sa listahan sa kapulisan isip high value individual human ma buy-bust sa mga sakop sa City Drug Enforcement Unit sa Cebu City Police Office (CPPO) alas 10:06 sa gabii, Huwebes, Hunyo 12, 2025 sa Sityo San Juan, Barangay Mambaling, Siyudad sa Sugbo.
Ang dinakpan giila nga si Gilbert Navarro alyas “Amay”, 30, taga Sityo Riverside, Barangay Duljo Fatima.
Nakuha sa kapulisan ang binulto sa gituohang shabu nga motimbang sa 150 gramos nga dunay standard drug price nga P1,020,000 nga giduso na dayon sa PNP Regional Forensic Unit 7 alang sa himuon nga chemical analysis.
Usa sa mga personnel sa CDEU sa CCPO nibutyag nga niadtong 2022 nadakpan na si Amay sa susama nga kaso ug bag-o lang kini nakagawas pagka Pebrero 2025 apan giingong nibalik sa iyang naandan nga negusyo.
Human ma-monitor ang iyang ilegal nga kalihukan gilusad dayon ang buy- bust.
Kalapasan sa Section 5 ug 11, Article II Republic Act 9165 ang ipasaka nga kaso sa CDEU sa maong suspek. / AYB