IMBES kay gitabang sa dihang gikutasan, gipusil-patay ang 45 anyos nga ex-convict sa dihang nipahuway sa usa ka barungbarong sa dalan Sabellao, Barangay Poblacion Pardo, Dakbayan sa Sugbo sa alas 2:15 sa hapon Martes Marso 18, 2025.
Ang biktima giila nga si Rudgie Dela Peña, 45, adunay kapuyo, taga Barangay Tungkop, Lungsod sa Minglanilla.
Ang biktima napriso kaniadto sa kasong illegal possession of firearm ug matod pa nalambigit sab siya sa ilegal nga kalihukan.
Usa sa iyang kabanay nga wala magpaila niingon nga magsuroyan ang biktima sa maong lugar kay diha ilang pamilya namuyo kaniadto.
Niabot ang biktima sa maong lugar ug gipalingkod sa barungbarong sa dapit aron nga makapahuway kay gikutasan.
Naglisod sa pagginhawa si Dela Peña ug gitabang ug gipaypayan.
Wala sab magdugay adunay duha ka lalaki nga nagsakay sa motorsiklo ang niabot, nikanaog ang sakay ug niduol sa nahimutangan sa biktima.
Walay daghang pangutana gipusil ang biktima.
Ang mga sakop sa Scene of the Crime Operatives (SOCO) nakarekuber sa 12 ka kabhang sa bala sa crime scene sa wala pa matino ang matang sa armas nga gigamit.
Nakuha sab gikan sa biktima ang mga pakete nga adunay shabu, lighter, sinsilyo, selpon ug ug wrench (tools sa motor), lakip sa yawi sa motor.
Nagpadayon ang imbestigasyon sa kapulisan pagsubay sa motibo sa pagpusil patay kang Dela Peña. / GPL / DVG