Hugot karon sa ilang monitoring ang kapulisan sa Central Visayas labot sa posibling pagpatuman sa permit to win ug permit to campaign sa mga sakop sa New People’s Army sa Lalawigan sa Negros Oriental ug Bohol ning padayon nga kampanya sa mga kandidato sa Barangay and Sangguniang Kabataan Elections.
Matod ni Police Lieutenant Colonel Gerard Ace Pelare, sa usa ka online forum, nakadawat sila og report sa nanglabay nga mga election nga dunay ingon niini nga gihimo ang mga rebeldeng NPA apan karon wala pa.
Gani, atol sa Regional Joint Security Control Center Meeting, gipatutukan sa Armadung Kusog sa Pilipinas ang mga dapit sa Negros Oriental ug Bohol nga dunay presensya sa NPA aron dili sila makalusad og extortion activities.
Lakip sa ilang gihingusgan ang Oplan Kontra Bigay program sa Commission on Elections diin ilang abagan ang maong ahensya sa pagdakop niadtong mga kandidato nga mamalit og botos, lakip na ang mobaligya sa ilang botos.
Ubos sa kamandoan sa Comelec, mahimong dakpon diha-diha dayon ang masakpan nga ningtunol ug kwarta ngadto sa usa ka botante, lakip na ang nidawat niini.
Usa sa ilang gipangandaman ang posibling pagsaka sa krimen atol sa adlaw sa botasyon sanglit nakatutok ang kapulisan sa BSKE.
Apan gipasalig ni Pelare nga duna pay daghang police personnel nga gitahasan nga mopatuman sa anti-criminality.
Walay nadawat nga hulga ang kapulisan apan bisan pa niini wala sila mokompyansa nga tungod niini, tanang vital installations ang gipangbantayan.