Mohimo og imbestigasyon ang buhatan ni Mandaue City Mayor Thadeo “Jonkie” Jovito Ouano, Jr. sa nangadaot nga mga bugas gikan sa kagamhanan sa Lalawigan sa Sugbo.
Ang maong mga bugas moabot ngadto sa dul-an 400 ka sako nga NFA Rice nga napalgan nga napundo lang sa warehouse sa Barangay Tawason sa maong dakbayan.
Matod ni Mayor Jonkie Ouano nga bisan nibutyag pa ang Department of Agriculture nga mamahimo pa nga makaon ang maong mga bugas apan di gyud siya motugot nga ipanghatag kini sa mga tawo.
Gilikayan sa mayor nga kung dunay madaot tungod sa pagkaon sa maong mga bugas sila ang mapasanginlan hinuon.
Kahinumdoman nga ang 397 ka sakong bugas kabahin sa 1,074 ka sako nga nadawat sa kagamhanan sa Mandaue atol sa pagpatuman sa Sugbo Mekado Barato kun (SMB) program nga gipatuman ni kanhi Gobernador Gwen Garcia.
Ang maong mga bugas alang unta sa mga pamilya nga mga kabus, PWD, lakip na ang mga single parents ug makapalit sila og tag duha ka kilo matag semana.
Nakita ni Ouano nga dunay dakong hagit sa ilang habig tungod kay wala siya masayod kung duna bay kontrata ang dakbayan tali sa kagamhanan sa lalawigan.
Gibutyag sa mayor nga napakyas gyud ang gitahasan niini sa pag-monitor kung naunsa ang maong mga bugas.
Apan gipaniguro ni Ouano nga manubag ang mga tawo nga maoy responsabli nganong nadaot ang maong mga bugas.
Nag-umol og fact finding committee ang mayor aron mohimo sa lawom nga imbestigasyon.
Gituohan nga kapin na sa usa ka tuig nga na-stock ang maong mga bugas nga maoy hinungdan nga nadaot na kini ug dili na mamahimong kaunon sa tawo.
Kasamtangan lang una nga ipabilin sa warehouse ang dul-an 400 ka sako sa bugas nga naa nahimutang sa Barangay Tawason samtang nagpaabot pa sa rekomendasyon kung unsaon pag-dispose kung mamahimong ipakaon nalang ba kini sa kahayopan.
Ang kagamhanan sa Mandaue wala pa makapagawas og kwarta alang sa bayad sa maong mga nadaot nga bugas. / AYB