Nabantog si Alex Compton isip tirador sa Manila Metro Stars sa nabungkag nga Metropolitan Basketball Association (MBA) kaniadto.
Mao kini ang naghatag kaniya’g agianan aron mahimo’ng coach Alaska Aces ug deputy coach sa Gilas Pilipinas.
Dugay na man tuod siya nawala sa senaryo, apan tataw nga duol sa kasingkasing ni Compton ang basketball sa Pilipinas.
Ning bag-uhay, nidalikyat pagbisita sa nasod si Compton ug nag-analyst siya kadiyot sa 2024 NBTC.
Sa iyang pagtrabaho sa NBTC, nakasugat si Compton og pangutana kon kinsa ang iyang all-time starting five sa Philippine Basketball Association (PBA).
Nasurpresa man tuod apan gitubag ni Compton ang maong pangutana.
Alang kaniya, ang iyang PBA all-time starting five mao sila si June Mar Fajardo, Allan Caidic, Johnny Abarrientos, Erik Menk, ug Ranidel de Ocampo. (ESL)