Nagbangis ang Sugboanong higante nga si June Mar Fajardo ug nagpakatap kini og mangtas nga mga numero – 40 puntos ug 24 rebounds – aron luwason ang San Miguel Beermen gikan sa pagpanghulga sa Converge FiberXers, 109-105, sa deciding Game 5 sa quarter-finals series sa Philippine Basketball Association (PBA) Season 49 Governiors’ Cup niadtong Dominggo sa gabii, Oktubre 6, 2024, sa Ynares Center sa Antipolo City.
Ang produkto sa University of Cebu (UC) Webmasters ug lumad nga taga lungsod sa Pinamungajan, Cebu nirehistro sab og 15-of-27 fieldgoals ug 10-of-12 freethrows.
Sa kadaugan, ang Beermen ning-abante sa best-of-seven semi-finals series aron harungon ang Brgy. Ginebra Gin Kings sugod karong Miyerkules, Oktubre 9.
Ang FiberXers, nga nasugamak sa kapildihan sa nag-unang duha ka mga duwa sa series apan ningbawos sa nagsunod nga duha ka mga duwa aron ihanhay kining tinagakay nga kombati, daw paingon na unta nga makakompleto sa ilang misyon dihang nakaposte sila og 13 puntos nga labaw sa 2nd half.
Naglabaw lang gihapon ang FiberXers, 99-91, sa nahabiling kapin sa pito ka mga minutos.
Human niini, gidugkatan ni Fajardo ang 10-0 nga rally sa Beermen nga naghatag kanila og 101-99 nga labaw sa nahabiling 4:25 minutos. Grabe na ka kulbahinam ang nagsunod nga mga aksyon apan gipaneguro ni Fajardo, 8-time MVP awardee, nga maluwas niya ang iyang puwersa.
San Miguel (109) - Fajardo 40, Anosike 23, Perez 10, Rosales 9, Trollano 7, Lassiter 6, Cruz 6, Tautuaa 5, Romeo 3.
Converge (105) - Jones 29, Stockton 22, Santos 16, Cabagnot 14, Winston 8, Arana 8, Delos Santos 4, Nieto 2, Caralipio 2. / ESL