Kasamtangang nag-una ang Sugbuanong higante sa San Miguel Beermen nga si June Mar Fajardo sa inilugay sa MVP title sa Philippine Basketball Association (PBA) Season 48.
Pagkahuman sa 2024 Commissioner’s Cup, ang seven-time PBA MVP nakatigom og 40.9 average statistical points gikan sa iyang averages nga 16.2 puntos, 12 ka rebounds, 2.3 ka blocks, 2.5 ka assists ug 1.1 ka steals.
Nagsunod sa produkto sa University of Cebu (UC) Webmasters mao sila si Christian Standhardinger sa Brgy. Ginebra Gin Kings ug CJ Perez sa Beermen.
Si Standhardinger adunay kartada nga 35.7 SPs gikan sa iyang averages nga 16.5 puntos, 9.9 ka rebounds ug 5.0 ka assists samtang si Perez nakapundo og 35.4 SPs gikan sa iyang averages nga 16.9 puntos, 6.0 ka rebounds, 3.6 ka assists ug 2.3 ka steals.
Naa sab sa listahan sa mga kandidato sila si Arvin Tolentino ug NorthPort Batang Pier (35.1 SPs), ug Calvin Oftana sa TNT Tropang Giga (34.1 SPs).
Mokompleto sa Top 10 mao sila si Ginebra guard Scottie Thompson (31 SPs), Chris Newsome sa Meralco Bolts (28.5), Jio Jalalon sa Magnolia Hotshots (28.4) ug ang laing mga sakop sa Ginebra nga sila si Maverick Ahanmisi (27.6 SPs) ug Jamie Malonzo (27.58).
Sa laing bahin, si Stephen Holt sa Terrafirma Dyip maoy nag-una sa inilugay sa Rookie of the Year award.