Usa ka family driver ang gipusasan sa mga sakop sa Philippine Drug Enforcement Agency (PDEA)-Lapu-Lapu City Team human kini nakuhaan og usa ka kilo sa gituohang shabu atol sa buy-bust sa alas 12:30 sa kaadlawon, Martes, Mayo 20, 2025, sa Sitio Matumbo, Barangay Pusok, Siyudad sa Lapu-Lapu.
Ang suspek giila ni PDEA 7 Acting Regional Director Alex Tablate nga si alyas Michael, 38, driver, taga Barangay Yati, Lungsod sa Liloan. Nakuha sa mga operatiba sa PDEA 7, uban sa City Intelligence Unit ug Station 5 sa Lapu-Lapu City Police Office ang usa ka kilo sa gituohang shabu nga dunay estimated average market value nga P6,800,000 ug ubang mga ebidensya.
Ang mga nakuhang ebidensya giduso na sa PDEA 7 Regional Office Laboratory alang sa himuon nga chemical analysis.
Matod ni Leia Alcantara, information officer sa PDEA 7 nga usa ka buwan nila nga gipaubos sa case buildup ang maong suspek human sila nakadawat og kasayuran gikan sa confidential informant mahitungod sa iyang ilegal nga kalihukan.
Giingong makabaligya ang suspek og 10 ka kilo nga ilegal nga drugas matag semana.
Sa nakuha nga impormasyon sa PDEA 7, si Michael adunay balay sa Liloan apan ang iyang pamilya tua na sa Iloilo.
Ila pa kini nga ipaubos sa imbestigasyon aron sutaon kon asa gikan ang iyang suplay sa ilegal nga drugas. Sa pagsuwat ning balita, nagdumili pa og hatag og impormasyon sa mga imbestigador ang suspek kinsa mag-atubang og kasong kalapasan sa Section 5, Article II, Republic Act 9165 kon Comprehensive Dangerous Drugs Act of 2002. / AYB