Farm gironda; 2 ka tawo nakuhaan og mga armas

MGA ARMAS: Ang mga suspek nga sila si Roderick Cortabirte Satuito ug Elmar Torres Lumanat nagtan-aw samtang giimbentaryo ang mga ebidensya nga nakuha gikan kanila nga gilangkuban sa tag-as nga mga armas. /TAMPO
MGA ARMAS: Ang mga suspek nga sila si Roderick Cortabirte Satuito ug Elmar Torres Lumanat nagtan-aw samtang giimbentaryo ang mga ebidensya nga nakuha gikan kanila nga gilangkuban sa tag-as nga mga armas. /TAMPO

Duha ka mga tawo nga nadakpan dihang gironda sa kapulisan sa alas 2 sa kaadlawon sa Sabado, Disyembre 16, ang usa ka farm sa Brgy. Apo, lungsod sa Argao ug nakuhaan og tag-as nga kalibre sa mga armas.

Ang mga suspek giila nga sila si Roderick Cortabirte Satuito, lumad nga taga Vista Grande, Brgy. Candulawan, dakbayan sa Talisay ug si Elmar Torres Lumanat, giingong bata-bata sa nahauna.

Ang nironda mao ang Criminal Investigation and Detection Group (CIDG) Cebu Provincial Field Unit, inabagan sa 2nd Provincial Mobile Force Company (PMFC) sa Cebu Police Provincial Office (CPPO) ug Argao Municipal Police Station nga gipangulohan sa ilang hepe nga si PMaj. Ivy Martin Bartolome ug Regional Mobile Force Battalion (RMFB 7).Ang operasyon nga tipik sa Oplan Paglalansag Omega, nag-subject kang Satuito.

Nakuha gikan kaniya ang usa ka KG9 submachine pistol, magazine niini ug mga bala; duha ka mga shotgun ug mga bala niini; ug usa ka M4 Armalite rifle, magazine ug mga bala niini, usa ka AR-15 rifle ug mga bala niini ug usa ka granada.

Samtang atol sa ronda, si Lumanat naaktuhan nga nag­hupot og kalibre .45 nga pistola, magazine ug mga bala niini.

Ang kapulisan dunay dala nga search warrant nga giisyu ni Presiding Judge Noel Darren C. Damian sa Branch 26 sa Regional Trial Court sa Argao nga gipetsahan og Dis­yembre 13, 2023.

Matod sa usa ka opisyal nga nihangyo nga di nganlan nga ilang gipahigayon ang raid human nitaho ang usa ka concerned citizen nga dunay mga armadong tawo nga mag-anhaan sa farm nga ilang gidudahan nga mga bodyguard sa mga politiko niadtong miaging eleksyon.

Ang kasilinganan nangabalaka niini ug nakompirmar sa ilang pagpaniid nga tinuod ang taho.

Kasong ilegal nga paghupot og mga armas ug explosive ipasaka batok sa mga suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph