Pamorma, pagbati ug pagkababaye mao kini ang sentro sa dula nga "Love, Loss and What I Wore" nga makita sa mga Sugboanon karong umaabot Agusto 16 ug 17, 2025, alas 8 sa gabii sa Grand Ballroom sa Marco Polo Plaza Cebu.
Gikan sa best-selling book ni Ilene Beckerman, gi-adapt kini sa mag-igsuon nga sila si Nora ug Delia Ephron, mga haligi sa Broadway ug pelikula.
Ang "Love, Loss and What I Wore" gipasigarbo sa usa ka press conference niadtong Hulyo 30 sa Marco Polo Plaza diin gihulagway isip artistic showcase ug emotional storytelling.
Ang debut ni Charlene Virlouvet isip full-length director gilauman nga magdala og lainlaing emosyon sa mga manan-aw.
Usa siya ka seasoned theater performer nga karon molingkod na sa director’s chair. Ang tanang eksena ipahigayon sa living room-style stage, aron ipakita ang kahayahay ug kasinatian sa kinabuhi sa usa ka babaye.
“Dili lang ni kabahin sa sinina,” matod pa ni Virlouvet. “Kini kabahin sa mga estorya nga gisul-ob nato matag adlaw — mga kasakit, mga handum, ug mga kahadlok nga giatubang sa tanang kababayen-an.”
Kinse (15) ka mga kababayen-an ang molangkob sa cast — tanang pinili base sa ilang emosyonal nga lalom ug pagkamatinuoron.
Lakip sa cast mao sila: Aleah Alerre Lim, Andi Pateña-Matheu, Anya Lim, Elaine Bathan, Gingging Navarro-Laude, Liana San Diego, Mikee Amasgila, Regal Oliva, Regina Binuenza, Sarah Mae Enclona-Henderson, Shanice Kae Suarez, Shifrah Bouchikhi-Enclona, Vanessa Fe, ug Victoria Leslie Ingram.
Bisan og base kini sa kasinatian sa mga Amerikanang kababayen-an, mituo ang cast nga global ang mensahe sa dula.
“Walay gipili ang kasakit ug gugma. Kita tanan naka-experience og loss, pagmahal, ug pagpakabuhi. Mao nga maka-relate ang bisan kinsa,” matod ni Enclona-Henderson.
Gikan sa closet padulong sa kasingkasing, ang "Love, Loss and What I Wore" usa ka dula nga sagol katawa, luha, ug repleksyon sa matag babaye. Ang matag outfit, adunay estorya ug kini nga dula, andam aron makita sa tanan. / Tampo ni Jesson J. Morata