Nanawagan sa Land Transportation Office (LTO) Region 7 ang usa ka modern transport organization sa Sugbo nga luag-luagan ang pagpatuman sa “anti-sardinas” policy.
Ilang gitumbok nga makaapiktar ang polisiya sa Modern Public Utility Jeepneys (MPUJs).
Sa usa ka phone call interview, si Federation of Cebu Transport Cooperatives (FCTC) President Ellen Maghanoy niadtong Huwebes, July 10, 2025, nagkanayon nga ang grupo nihangyo sa LTO 7 nga mosagop sa “maximum tolerance” sa pagpatuman sa lagda nga nag-limit sa mga MPUJs nga lima lang ang gitugot nga standing passengers, ilabi na atol sa peak hours nga daghang mga pasahero ang magpaabot og sakyanan.
“Kato man gud to sa anti-sardinas policy. Kay kana man gud five nga standing is sayang kay naa pamay enough space nga pwede pa untang sakyan sa atong commuters… during peak hours daghang gyud mga pasahero ma-stranded ,” matod niya.
Nidugang si Maghanoy nga ang ilang grupo nihangyo nga itugot ang napulo ka standing passenger capacity imbes lima lang.
“So, ang amoa ana kinahanglan nga ang five himuon na untang ten para makuhakuhaan ang mga commuters nga nag-standby ,” pasabot niya.
Ang tigom uban ni LTO 7 Regional Director Glen Galario gihimo sa ilang Operations Division Office sa Natalio Bacalso Avenue sa Cebu City.
Giila sa FCTC ang papel sa LTO 7 limitado ra sa pagpatuman ug nga ang bisan unsang kausaban sa limitasyon sa kapasidad sa pasahero kinahanglan idirekta sa Land Transportation Franchising and Regulatory Board (LTFRB) ug sa Department of Transportation (DOTr).
“Pero ingon ang LTO, sila is enforcement ra so adto mi ana sa LTFRB ug DOTr... Mao sab na among ihangyo ug maghimo mi og position paper isubmit namo LTFRB ug DOT,” matod ni Maghanoy.
Ang polisiya nga “anti-sardinas,” gisubli sa LTFRB niadtong Martes, Hulyo 8, nagdili sa overloading sa mga pasahero sa mga pampublikong sakyanan.
Kini klaro nga nag-limit sa nagbarog nga pasahero sa MPUJs ngadto sa lima matag metro kwadrado sa magamit nga luna, diin ang mga paglapas adunay tugbang nga multa ug silot.
Ang kooperatiba gipahibalo usab sa umaabot nga national policies pinaagi sa bag-ong memorandum circulars (MCs).
Naglakip kini sa mandatory drug testing ug mandatory alcohol testing alang sa mga drayber sa MPUJ ug sa speedometer sa tanang units.
Sa iyang bahin, gihangop ni Director Galario ang panawagan sa grupo ug nakigkonsulta sa LTO. / CDF