Gipalig-on sa Department of Social Welfare and Development (DSWD) 7 ang kahibalo sa mga benepisyaryo sa Pantawid Pamilyang Pilipino Program (4Ps) kabahin sa pagpanalipod sa ilang salapi pinaagi sa Family Development Session (FDS) nga nagtutok sa paglikay ug pag-ila sa mga financial scam.
Gipahigayon ni 4Ps City Link Maria Regin Balaga, nga nadestino sa sa Barangay Basak, Lapu-Lapu City, ang maong sesyon aron matabangan ang mga 4Ps partner-beneficiaries nga masabtan ug malikayan ang nagkalainlaing matang sa mga peke nga investment ug lending schemes nga kasagarang gigamit sa mga manlimbong.
Sumala sa DSWD 7, kasagarang target sa mga fraudster ang mga kabos nga pamilya pinaagi sa mga saad sa paspas ug dako nga kita.
Tungod niini, gihatagan ang mga partisipante og praktikal nga kahibalo ug giya sa pag-ila sa mga ilhanan sa panlimbong aron mapanalipdan ang ilang kita ug ang cash grants nga gituyo alang sa panglawas, edukasyon, ug nutrisyon sa ilang pamilya.
Atol sa sesyon, gigamit ang FDS learning kits ug visual aids aron mas masabtan sa mga partisipante ang mga pamaagi sa mga manlimbong.
Lakip sa gihisgutan ang mga peke nga investment offers, pyramid schemes, advance-fee scams, ug uban pang red flags nga kinahanglan bantayan sa mga konsyumer.
Gipahinumdoman sab ang mga benepisyaryo sa hustong mga lakang nga buhaton kon mahimong biktima sila sa scam ug giawhag sila nga magmatngon sa matag transaksyon ug oportunidad sa pagpamuhonan.
Gipasiugda sab sa diskusyon ang importansya sa maayong pagdumala ug pagpanalipod sa ilang gipinaningkamotan nga kita ug sa ayuda nga ilang nadawat gikan sa programa batok sa mga malimbungong pamaagi nga nagsaad og sayon nga pagdato.
Alang kang Hermilin C. Perez, usa ka 4Ps partner-beneficiary gikan sa Barangay Basak, dako ang natabang sa maong sesyon sa pagpalawom sa iyang kahibalo batok sa mga financial scam.
“Daghan na ang nag-offer nako nga moapil sa mga ing-ani nga pamaagi kay dako kuno og kita, apan para nako, wala gyuy dali nga kuwarta; kinahanglang gyud kini paningkamotan ug haguan. Dili ta basta-basta magpailad tungod lang sa saad nga dali nga kita, ilabina kon mangayo na og dako nga kantidad sa kuwarta,” matod ni Perez. Dugang pa niya nga pinaagi sa Family Development Session, mas nilalom pa ang iyang pagsabot sa mga financial scam ug sa mga paagi aron malikayan kini.
Pinaagi sa mga giya nga diskusyon ug tinuod nga mga pananglitan, gidasig sa DSWD ang mga benepisyaryo nga mahimong responsable sa pagdumala sa ilang pinansyal nga kahimtang ug mahimong mas alerto ug maalamong mga konsyumer.
Padayon nga gipasiugda sa DSWD Field Office 7 ang Family Development Sessions isip usa ka plataporma alang sa pagpalapad sa kahibalo, pagpalig-on sa komunidad, ug paghatag og gahom sa mga pamilyang sakop sa 4Ps. / PR