POSIBLING mabalhin karong tuiga ang female dormitory sa Bureau of Jail Management and Penology (BJMP) sa Mandaue City adto sa Sitio Dungguan, Barangay Basak.
Kini dugay nang gitinguha aron masulbad ang grabeng kahuot ug dili maayong kahimtang sa pagpuyo sa kasamtangang pasilidad sa Barangay Looc.
Matod ni Warden Shela Serrano sa BJMP Mandaue Female Dormitory, ang kasamtangang prisuhan mosulod lang og 22 ka indibiduwal, apan karon 94 ka babaye nga Persons Deprived of Liberty (PDLs) ang anaa, ug moabot sa 380 porsiyento nga congestion rate.
“Mga 80 porsiyento sa among mga babaye nga PDLs nag-atubang og kaso nga may kalabutan sa druga,” matod ni Serrano.
Dugang niya nga tungod sa grabeng kahuot ang mga binilanggo kulang sa saktong sanitasyon, personal nga luna, ug serbisyo sa rehabilitasyon.
Wala pay tukmang petsa nga gihatag si Serrano kon kanus-a makabalhin kay giagad pa kon kanus-a mahuman ang building.
Ang bag-ong prisuhan nga gigastuhan sa Kagamhanan sa Siyudad sa Mandaue, hapit na mahuman, ug ang pagtukod sa usa ka trench drainage system ang gitiwas.
Ang building makatabang nga matambakan ang lugar ug makatabang pagpaminos sa kanunay nga hulga sa pagbaha sa maong dapit.
Ang bag-ong dormitoryo adunay four-in one building setup nga adunay upat ka selda nga mosulod hangtod sa 42 ka babaye nga PDLs.
Ang female dormitory dunay administrative building nga gipatukod ni Mandaue City Lone District Rep. Emmarie “Lolypop” Ouano-Dizon nga gipundohan og P35 milyunes.
Samtang wala pa kini mahuman, ang mga personnel sa BJMP temporaryo nga mogamit sa duha sa mga selda sa dormitoryo aron makapadayon sa operasyon.
Dugang niini, usa ka P10-milyunes nga embankment project o pagtambak sa lugar nga gipundohan sa kagamhanan sa siyudad ang gihimo aron mapataas ang elevation sa prisuhan ug masiguro nga kini dili mabahaan.
Mahitungod sa daan nga female dormitory sa Barangay Looc, niingon si Serrano nga i-turnover kini sa kagamhanan sa siyudad human sa pagbalhin.
Gibutyag ni Serrano nga sa iyang nahibaw-an, giplanuhan kining maoy butangan sa Mandaue City College. / CAV