Moduwa si Philippines standout Quentin Millora-Brown sa Macau Black Bears sa pagpakigbatok niini sa Gilas Pilipinas karong Hulyo 28, 2025, sa Smart Araneta Coliseum.
Ang duwa nagsilbeng tune up game sa Gilas sa dili pa kini mohamag sa Fiba Asia Cup, nga gikatakda karong Agusto 5-17, sa Jeddah, Saudi Arabia.
Gibutyag sa Black Bears sa social media nga nipirma na kanila og kontrata ang 6’10” Fil-Am forward, kinsa maoy nangulo sa malampusong kampanya sa University of the Philippines (UP) Fighting Maroons sa UAAP Season 87.
“He will join the team for the upcoming TAT [The Asian Tournament] Shanxi stop and the highly anticipated July 28 matchup against the Philippine National Team, anchoring the Black Bears’ frontcourt with strength and versatility,” pamahayag sa Black Bears.
Si Millora-Brown kuhaon unta sa Gilas apan wala pa nahan-ay ang mga dokumento nga gikinahanglan aron tugotan nga makaduwa isip local player base sa lagda sa Fiba. / ESL