Depensahan ang titulo

Didal. (File photo)
Didal. (File photo)

Ang Sugbuanong skateboar­der nga si Margielyn Didal ang usa sa gilaoman nga mohatag og dungog sa Pilipinas sa 19th Asian Games didto sa Hangzhou, China.

Si Didal ang gold medalist sa women’s street skateboarding sa 18th Asian Games didto sa Indonesia tuig 2018 diin nakabulsa og upat ka bulawan ang Pilipinas gikan sa skateboarding, weightlifting, individual wo­men’s golf ug team women’s golf.

Matod sa 24-anyos nga si Didal, ang unang misyon niya mao ang pagsulod sa finals, kon makasulod na sa finals didto na niya suwayan paglab­ni ang podium spot.

“We trained in Thailand before coming here. My goal is to make it to the finals. From there, I’ll try to get to the podium,” batbat niini sa interbiyu sa media.

Naabot si Didal didto sa Athletes Village, Hangzhou, China niadtong Miyerkules sa miaging semana.

Ang double-gold medalist sa South­east Asian (SEA) Games 2019 mopresentar sa Pilipinas sa women’s division kauban si Mazel Alegado, samtang si Renzo Mark Feliciano, Jericho Francisco Jr. ug Motic Panugalinog maoy mobirada sa men’s division.

Sugdan ang street skateboarding competition karong adlawa sa Qiantang Roller Sports Center.

Si Didal ug world No. 2 pole vaulter nga si EJ Obiena maoy flag-bearer sa Pilipinas sa ope­ning ceremony sa Sabado sa gabii nga gisalmotan mismo ni Chinese President Xi Jinping.

Ang Pilipinas mipadala og 396 ka Filipino athletes alang sa kompetisyon nga gisalmo­tan sa 45 ka nasod.

Niadtong 2018, miuli ang Team PH nga adunay upat ka bulawan, duha sa pilak ug 15 ka bronze.

Na-delay ang Asian Games og usa ka tuig tungod sa Covid-19 measures sa China. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph