Gimanduan ni Cebu City Mayor Raymond Alvin Garcia ang Cebu City Disaster Risk Reduction and Management Office (CCDRRMO) ug ang Metropolitan Cebu Water District (MCWD) sa dinalian nga pagbawi ug pagpintal sa tanang fire hydrants nga naa sa siyudad.
Ang kamanduan giluwatan atol sa tigom sa Cebu City Hall niadtong Martes, Abril 8, 2025, nga gitumong aron mapadali ang paghatag og supply sa tubig ilabi na gyud kon dunay sunog ilabi na sa pagpangandam sa nagsingabot nga ting-init.
Gitataw ni Garcia nga dinalian kini nga himuon tungod kay ang buwan sa Abril gikonsiderar nga labing init karong tuiga hinungdan nga andamon kanunay ang mga fire hydrant.
“Fire hydrants have to be identified, have to be recovered, and have to be repainted to the Philippine standards,” matod ni Garcia.
Giklaro sa mayor nga ang fire hydrants kinahanglang pintalan og yellow ug libutan og yellow-black stripes aron motugma sa international standards aron mas sayon makit-an ug maila panahon sa emerhensiya.
Gitataw sab sa mayor ang kamahinungdanon sa fire hydrants nga walay makaali ug sayon nga magamit.
Gimanduan usab niya ang Cebu City Transportation Office (CCTO) sa estriktong pagpatuman sa no-parking zones sa mga dapit nga nahimutangan sa fire hydrants.
“Recover all the fire hydrants, repaint them so that they will be identified as such so that in case of emergencies we can get water from them because na identify na nato kung asa,” dugang ni Garcia. / JPS