Sa South Road Properties (SRP) gihapon ipahimutang ang firecracker zone sa dakbayan sa Sugbo nga gitakdang buksan karong Disyembre 20, 2023.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga nakig-alayon sila sa Regional Civil Security Unit (RCSU-7) ug nasuta nga nalangay ang pagbukas sa firecracker zone tungod sa pagkasunog sa buhatanan og pabuto sa Barangay Babag 2, dakbayan sa Lapu-Lapu.
Ang maong insidente mikalas og unom na ka mga kinabuhi base sa report sa kapulisan sa dakbayan sa Lapu-Lapu.
Duna nay 15 ka negusyante og fireworks ang ning-apply og permit sa buhatan sa RCSU-7 aron mahatagan sila og pagtugot nga makabaligya sa mga pabuto.
Dugang ni Rafter nga ang CCPO ug RCSU-7 naghiusa nga ma-monitor ang firecracker zone pinaagi sa pag inspection niini aron kalikayan ang disgrasya sama sa pagkasunog.
Gipaabot pa hinuon nila ang opisyal nga listahan sa Police Regional Office 7 sa mga gidili nga ibaligya nga pabuto nga mamahimo’ng magbutang sa peligro sa mga migamit niini.
Apan iyang giklaro nga kadto lamang dunay permit gikan sa PNP ang tugotan nga makabaligya ug didto lang sa firecracker zone nga mao ang SRP.
Kon dunay makita diha sa karsada nga nag-display og mga pabuto nga wala sa designated area, mamahimo siya nga dakpon ug imbarguhon ang paninda niini.
Istrikto ang PNP sa maong lagda aron malikayan ang sunog ug disgrasya sa usa ka dapit kon pasagdan lamang kini.
Una nang niawhag ang PNP Central Visayas nga ning panahon sa Pasko ug pagsugat sa Bag-ong Tuig labing maayo nga likayan ang pag gamit sa mga dagkong pabuto.
Lakip sa ilang gipanawagan ang mga nanag iya og armas nga dili kini pabuthon sanglit usa ni sa labing peligro nga makaigo og tawo.