Sa ikawalo niining edisyon, ang “First of Fury” boxing series sa Chao Sy Boxing Promotions (CSBP) pang-bigtime na.
Mismong si CSBP head Lorenzo “Chao” Sy maoy niingon niini Sabado, Hulyo 12, 2025, atol sa opisyal nga pag-anunsyo sa Fist of Fury 8: Philippines vs. Japan boxing promotion sa La Fortuna Bakery & Cafe, Dakbayan sa Sugbo.
Gipasabot ni Sy nga nagsugod siya sa ginagmay nga mga promosyon ug human sa pito ka mga edisyon, nakadesisyon siya nga isaka na laing andana ang gipasiugdahan niyang boxing series.
“Nagsugod ko sa ubos unya naa na man ta’y international fights, pataas na gyud ta. Sa english pa…. Bigtime na!” batbat ni Sy, kinsa usa ka bigtime boxing promoter kaniadto sa Sugbo ug dili pa lang tantong dugay nga nibalik sa iyang gikahiligan.
Ang Fist of Fury 8: Philippines vs. Japan gikatakda karong Agusto 16, 2025, sa Sky Hall sa SM Seaside.
Masaksihan ning maong promosyon, nga adunay tulo ka championship fights, ang binukbokay sa mga Pinoy nga boksidor kontra sa mga Hapon nga kaatbang.
Sa main event, ang wala’y pildi ug sumosulbong nga boksidor sa Chao Sy stable nga si Junibert Bantay makigbatok ni Japanese Haruki Miyamoto alang sa inilugay sa World Boxing Foundation (WBF) Asia Youth super featherweight title.
Nagkanayon si Sy nga ang tanang mga away ning maong promosyon, hilabi na sa main event, pulos makahatag og katagbawan sa boxing fans gumikan kay iyang gipaniguro nga saktong binukbokay ug wala’y atrasay ang masaksihan.
“Dili ko gusto nga ang away magdinaganay, marathon na. Kining ako, sumbagay gyud, wala’y atrasay,” matod ni Sy.
Sa laing gikahinamang away, ang laing sakop sa Chao Sy stable nga si Jemuel Arañas makigsumbagay sa laing Japanese fighter nga si Kiyoto Narukami alang sa inilugay sa Philippine boxing Federation (PBF) flyweight title.
Samtang ang laing boksidor sa Chao Sy stable nga si Vicente Unidos makigsangka ni Kenneth Albino alang sa inilugay sa GAB Philippines bantamweight belt.
Aduna pa’y dugang mga paresan ang magbinukbokay sa promosyon. (ESL)