Sa labing unang higayon, mo-release ang Cebu Reggae band "Fiyah" sa ilang unang album nga gitawag niini nga "Fiyah Awakening."
Nagsugod niadtong tuig 2009 isip usa ka cover band, karon opisyal na nga aduna'y full album ang maong Cebuano reggae band nga i-release niini sa streaming platforms karong Dominggo, Mayo 4, 2025.
Apan sa dili pa ang ilang worldwide release, anaa'y pagahimuon nga album launch ang banda karong Sabado, Mayo 3 sa The Roofbar sa Dakbayan sa Lapu-Lapu.
Ang maong album aduna'y walo ka mga kanta ug aduna'y usa ka bonus track.
"We decided to look for new band players thus, adding new players. Moreover, we have decided to compose and make original songs and introduced the new faces of FIYAH." matod sa banda.
Tungod sa mga naagian sa banda, ang lima nga nagpabilin niini naglakip nila ni Richard (drummer), Dhen (lead guitarist), Elg (Sax), Chiwow (keyboard), ug Arvin (vocalist).
Sa kasamtangan, ang kinatibuk-an nga miyembro sa banda naglakip nila ni Ras Arb (vocals), Iam James Baluntang (2nd vocals/guitar), Jhen Dhen Espina (lead guitar), Dudz Carabas III (bass guitar), Louie Chiwow Tirol (keyboard), Jose Mari P. Doria (2nd keyboard), Elyr Gressin Rosales (saxo), ug Chardiman Osorio Fernandez (drums).
Unang original song composition sa banda ang There Was You nga sinuwat ni Mel Rosales nga gi-release Abril 2024. Gisundan kini sa Nowhere to Run nga gi-release sab sa susamang buwan.
Mayo 2024 dihang ilahang gi-release sab ang kantang STEALER feat. CoolieDread. Pipila sa reggae influences sa banda sila si Bob Marley, Alborosie, Max Romeo, Steel Pulse, 3rd World, Damian Marley, Julian Marley, Katchafire, House of Shem, Jordan T., O-shen, Inner Circle, Big Mountain, UB40, Tribal Seeds, Iya Terra , Steel Pulse, Kolohe Kai. etc.
Samtang sa lokal giidolo sab nila ang Tropical Depression ug Brownman Revival.
Malaumon ang maong local reggae band nga suportaran sila sa mga Bisaya hilabi na sa mga Sugbuanon. (SuperBalita)