Sa iyang pagbalik sa kickboxing, gipakita ni Renan “Flash” Noblefranca nga naa gihapon ang iyang kaabtik ug kusog.
Gipilde ni NobleFranca si Christian Mark Bughaw sa unanimous decision sa 57th Araw ng Sirawai “Sagupaan MMA Fight 2025 niadtong Hunyo 13, 2025 sa Sirawai, Zamboanga del Norte.
Dugay-dugay na usab nga wala makaduwa si Noblefranca sa kickboxing ring. Ang iyang kataposang narekord nga kickboxing duwa kay niadtong 2022, diin iyang gipildi si Ramil Yacapin sa unang round didto sa Dipolog City.
Apan sukad niadtong higayona, nag-focus si Noblefranca sa boxing. Duha ka beses siya nakig-duwa sa 2023 ug usa ka beses niadtong milabay nga tuig.
Si Master Benigno "Ekin" Caniga Jr., founder ug CEO sa Yaw-Yan Ardigma Cebu, nga naa sa ringside uban sa iyang anak nga si Ian Caniga, dugay usab nga wala makabalik sa martial arts scene. Apan human sa maayong performance ni Noblefranca, nibalik ang iyang gana sa duwa.
"I'm very happy that Flash won. My passion for martial arts has returned after I layed low since 2023," ingon ni Caniga Jr. sa interview sa SunStar Cebu.
Plano ni Caniga nga ablihan pagbalik ang Yaw-Yan Ardigma Cebu Gym ug nangita siya og mas maayong lokasyon karon.
"The Yaw-Yan Gym will open soon. I'm still looking for a better place with a parking area. Hopefully, I can reopen the gym this year."
Isip usa sa pioneer sa MMA sa Cebu, si Caniga Jr. mag-andam karon kang Noblefranca para sa umaabot nga Muay Thai Visayas Leg 2025 sa Ormoc City sa mga sunod nga bulan, ug sa National Muay Thai Championship qualifiers sa Pasig City sa katapusan sa tuig. / RSC