Miulbo ang sunog sa usa ka commercial building sa Barangay Eastern Poblacion, Lungsod sa Poro, Camotes Islands, Sugbo, nagkadaiyang mga tindahan ang naugdaw ala 1: 45 sa kaadlawon sa Pebrero 13, 2024.
Base sa imbestigasyon sa Bureau of Fire Protection (BFP) sa Poro, pinaagi kang FO2 Arman Gulvin, fire investigator, ang ground floor sa maong edipisyo diin nahimutang ang flower shop, sari-sari stores, cellphone shops, water refilling stations ug uban pa, ang gilamoy sa kayo.
Gibana-bana nga moabot og kapin sa P900,000 ang danyos sa istruktura, way labot sa mga kabtangan o ubang butang nga naugdaw sa kayo.
Si Gulvin nagkanayon nga sa iyang pasiunang imbistigasyon na suta nga ang sunog nagsugod sa flower shop ni Jessica Soralta ug didto na mikuyanap ang kayo sa tupad nga mga tingdahan.
Atol niining pagsuwat, wa pa matino kon unsay hinungdan sa pagdilaab sa kayo.
Way gikataho nga naangol sa maong hitabo.