Nakasinati na sab og pilde si Filipino MMA legend Eduard Folayang sa iyang pagpakigbatok og balik ni Japanese icon Shinya Aoki sa undercard sa ONE 172: Takeru vs. Rodtang niadtong Dominggo sa gabii, Marso 23, 2025, sa Saitama Super Arena sa Saitama, Japan.
Ning higayuna, nasugamak si Folayang sa first round submission sa iyang ikaupat nga pagpakig-away ni Aoki.
Si Aoki niagresibo dayon pagsugod sa away ug nisuway og double-leg takedown apan nakadepensa ra si Folayang.
Adunay higayon nga naigo ni Folayang ang bodega ni Aoki gamit ang iyang tuhod.
Apan daw sa usa lang ka pamilok, nagunitan ni Aoki ang kamot ni Folayang ug nakahigayon kini pagmugna og armbar.
Wala na nakalingkawas si Folayang ug naahat siya pagsurender sa ika-53 ka segundos pa lang sa engkuwentro.
Si Aoki nisaka sa 49-11 nga rekord samtang si Folayang nahagbong sa 23-14 nga baraha.
Sa premiro nilang sangka niadtong 2016, gipaundang ni Folayang si Aoki sa 3rd round aron dag-on ang ONE Championship lightweight title.
Sa ikaduha nilang sangka niadtong 2019, gibawsan ni Aoki si Folayang pinaagi sa arm-triangle choke sa first round aron bawion ang ONE Championship lightweight belt.
Sa ikatulong away niadtong 2021, gipasurender ni Aoki si Folayang sa 1st round pinaagi sa armbar. / EKA, ESL