KINAHANGLAN nga usbon ang polisiya sa direktang pagpriso sa mga drayber nga nalambigit sa aksidente sa sakyanan nga moresulta sa pagkaangol o kamatayon.
Kini ang panawagan ni Mandaue City Councilor Carlo Pontico Fortuna, nga nagduso alang sa pag-review sa nasudnong polisiya, nagtumbok sa mga kabalaka bahin sa due process.
Gipadayag ni Fortuna kini nga kabalaka atol sa regular nga sesyon sa Mandaue City Council niadtong Lunes, Hulyo 21, 2025.
Nagtuo si Fortuna nga ang kasamtangang praktis sa pagpriso sa mga drayber nga walay hustong imbestigasyon mahimong molapas sa ilang mga katungod.
Gibutyag niya kini nga mga kabalaka atol sa courtesy call ni Police Lt. Col. Keith Allen Andaya sa Mandaue Traffic Enforcement Unit nga nipasabot sa kasamtangang pamaagi.
Ang mga traffic enforcer kasamtangang nagpatuman sa Article 365 sa Revised Penal Code nga may kalabutan sa reckless imprudence, ug Rule 113, Section 5 sa Rules of Criminal Procedure nga nagtugot sa warrantless arrests ubos sa klaro nga mga kondisyon.
Apan gipasabot ni Fortuna nga ang kapulisan sagad molaktaw sa imbestigasyon nga mosangpot sa pagdakop bisan wala pa masayri kinsa ang sad-an sa aksidente.
Ang kasamtangang polisiya sumala ni Fortuna, kanunay nga moresulta sa pagpriso sa mga drayber nga gituohang sad-an.
Matod niya nga kini maka-pa-huyang sa due process.
Nanawagan si Fortuna sa Philippine National Police ug Kongreso nga ribyuhon ug posibleng usbon kining mga nasudnong lagda.
Ang iyang tumong mao ang pagsiguro nga samtang gipadayon ang kaluwasan sa publiko, ang mga katungod sa due process sa mga drayber mapanalipdan usab sa Mandaue City ug sa tibuok nasod. / CAV