Malampusong gipahigayon ang usa ka forum nga nagtigom sa mga Overseas Filipino Workers (OFWs), Solo Parents, Senior Citizens, ug ilang mga pamilya niadtong Hulyo 1, 2025, sa Dakbayan sa Carcar.
Ang kalihukan nga gimugna uban sa tema nga “Empowering OFWs and Families, Senior Citizens and Solo Parents: A Rights-Holders and Duty-Bearers Forum”, nagtumong sa paghatag og plataporma alang sa libre ug bukas nga pakig-estoryahanay tali sa mga OFW ug ilang pamilya, ug sa Department of Migrant Workers (DMW RO-VII) uban ang mga kauban nga ahensiya.
Mismo si Mayor Mario Patricio “Patrick” Barcenas ang nanguna sa pagsuporta sa kalihukan ug nipaabot sa iyang pasalamat sa tanang nitambong, hilabi na sa mga opisyal gikan sa DMW RO-VII, Commission on Human Rights (CHR), ug Department of Trade and Industry (DTI).
Gihisgutan sa forum ang mga programang pang-OFW, katungod sa mga solo parent ug senior citizens, ug ang Financial Awareness Seminar (FAS).
Gipangulohan sa mga opisyal sa DMW RO-VII ang ilang team sa forum ug gipasalamatan nila pag-usab ang Local Government Unit (LGU)-Carcar sa padayon nga suporta, ilabi na sa Kabayan Mini-Trade Fair niadtong Marso 2025.
Ang kalihukan nagpadayag sa tinguha nga mapalig-on ang suporta ug serbisyo alang sa OFWs ug ilang mga pamilya pinaagi sa kolaborasyon tali sa gobiyerno ug komunidad. / PR