Kon hisgutan na gani ang Frankfurt, Germany, kasagaran maghuna-huna ka sa dagkong mga bilding ug mga bangko. Apan kini dili lamang usa ka sentro sa negosyo, kondili, usa usab ka siyudad nga adunay daghang nindot nga mga dapit alang sa mga turista.
Ang Frankfurt gikonsiderar nga pinakadako nga sentro sa ekonomiya sa Europe. Kini mao ang pinuy-anan sa European Central Bank ug daghang mga kompaniya sa multinasyonal. Apan kon magsuroy-suroy ka, imong makita nga ang siyudad aduna pay taas nga kasaysayan sa kultura ug tradisyon.
Usa sa labing inila nga mga lugar nga bisitahan mao ang Römerberg, usa ka karaan nga square diin imong makita ang mga bakas sa mga balay nga istilo sa Edad Medya ug ang City Hall, nga nailhan sukad pa sa ika-15 nga siglo. Nahimutang usab dinhi ang Frankfurt Cathedral, diin daghang mga emperador sa Balaang Romanhong Imperyo ang gikoronahan.
Alang sa mga mahiligon sa arte, ang Museumsufer o Museum Riverbank ang saktong destinasyon. Adunay daghang mga museyo dinhi, gikan sa modernong arte hangtod sa karaang kasaysayan. Ug kon gusto nimo nga mag-relax human sa taas nga adlaw, mahimo kang molingkod sa Main River promenade samtang nagtan-aw sa skyline nga nagtagbo sa daan ug bag-o.
Kon bahin sa pagkaon, ayaw kalimti ang “Frankfurter Würstchen,” ang tradisyonal nga sausage nga paborito sa pan ug mustasa. Dugang pa, ang apple wine, ang lokal nga ilimnon, popular usab.
Bisan pa nga usa sa labing moderno nga mga lungsod sa Europe, ang Frankfurt nakahimo gihapon sa pagpangita og balanse tali sa pag-uswag ug pagpreserbar sa kultura. Mao nga kon nangita ka sa usa ka kasinatian gawas sa Pilipinas, ang Frankfurt sigurado nga usa sa mga lugar nga kinahanglan nga imong bisitahon sa imong sunod nga pagbiyahe. /