Madayon na ang away ni Fil-Swede prospect Alexander Fredriksson batok sa kanhi ALA Boy fighter Marjohn Yap sa main event sa gipasiugdahan sa Omega Sports Promotions nga “Kumbati 19” boxing card karong Mayo 16, 2025, sa IPI Compound sa Tingub, Mandaue City.
Si Fredriksson kinsa sakop sa Omega Boxing Gym, gilaumang makahimo og dakong pangalan sa ugma damlag.
Sa interbyu sa SunStar Cebu, nagkanayon si Omega coach Jinggoy Junco nga adunay saktong abilidad si Fredrikkson ug nagkinahanglan lang kining mahashasan og maayo pinaagi sa pagparang niini sa dekalidad nga mga kontra.
Sila si Fredriksson ug Yap niadto ra untang Pebrero 8 nakatakdang mag-away sa NUSTAR Resort and Casino isip usa sa undercard bouts sa “Binukbukay sa Sugbo”.
Apan wala kini nadayon gumikan sa ka dako sa gintang sa mga rekord sa duha ka mga boksidor.
Si Fredrikkson adunay 2-0, 2KOs nga rekord samtang si Yap adunay 34-19, 17KOs nga baraha.
Sa undercard, magbinukbokay sila si Arlando Senoc batok Eldin Guinahon, John Paul Panuayan batok Mario Bersano, Mark Gil Gandi batok Kasty Flores, Jubert Cahimat batok Aldren Aton, ug Crixian Arriola batok Francis Arante. / EKA, ESL