Luyo sa pagkuha sa mga maanindot nga hulagway ug video sa kinabuhi sa ilawom sa kadagatan sa lungsod sa Moalboal mao ang mga giya nga mananalom nakigbugno sa sulog ug jellyfish.
Usa niini mao si Jeganiel Mahinay, 26, lumad nga taga Moalboal, Cebu, kinsa maoy naggiya ni Dyyhin Paigan sa freediving atol sa Valentine’s Day, Pebrero 14, 2024.
“Naay daghang jellyfish ato, akoa jud siya nga gipasabot daan before mi mag-dive,” matod ni Mahinay.
Sa pakighinabi sa SunStar Cebu sa Sabado, Pebrero 17, 2024, si Mahinay nitandi sa nakitang mga jellyfish samtang naggiya kang Paigan alang sa freediving nga kalihokan sa Valentine’s Day.
Bisan pa og dili mahigalaon ang panahon niadtong higayona, gipasabot ni Mahinay nahagit siya sa pagkuha og nindot nga mga hulagway, apan labing importante nga iyang gitan-aw ang kaluwasan sa mga bisita.
Nagdako si Mahinay nga naghimo og pamana o spearfishing uban sa iyang amahan nga maoy ilang panginabuhian ug sa ulahi nagtrabaho sa usa ka dive shop sa duol ug didto mas nakat-on pa siya sa diving.
“Mamanaay ra jud ko sauna sa wala pa koy trabaho, spearfishing rako sige ma gabii,” matod ni Mahinay sa wala pa mosulod isip snorkeling guide.
Nag-enrol siya sa diving school samtang nagtrabaho sa usa ka dive shop kay gusto niya nga mahimong dive master apan dili mapadayon ang bayad tungod kay ang suweldo gibahin sa lisensya sa diving.
Nihunong siya ug gipadaplin ang iyang damgo sa pag-eskwela ug gisulayan ang snorkeling guide.
“Nibalhin nasad ko og snorkeling guide ug nag-training sad ko sa pagka snorkeling guide,” matod ni Mahinay.
Gipasabot niya nga nakuha niya ang iyang snorkeling guide certificate niadtong 2019 nga gidumala sa local government unit sa Moalboal.
Aron masagubang ang panginahanglan, si Mahinay nagtuon sa iyang kaugalingon og underwater videography ug pag-edit pinaagi sa pagtan-aw sa online aron mapalambo ang iyang kahanas.
Unsay kalainan tali sa snorkeling ug freediving?
“Ang freediving mao na siya ang moadto sa ilawom sa mga tag-as og hangin ug kabalo nga manglangoy daan; ang snorkeling is dili ra maggamit og mga long fins and normal [surface dive] ra nga langoy,” pasabot ni Mahinay.
Paambit ni Mahinay nga sa dili pa ang kalihokan, giandam niya ang iyang bisita sa dili pa mo-dive ug gipasul-ob kini og life vest alang sa ilang kaluwasan ug nagdala usab og life ring alang sa double safety.
Gawas sa ilang mga gamit, usa ka mubo nga sisyon sa briefing ang gitudlo aron mahibal-an nila kon unsa ang dili itugot.
Ang tumong ni Mahinay sa pagkakaron mao ang pagtabang sa iyang pamilya ug pagtukod sa iyang gipangandoy nga balay.