Usa ka fruit vendor sa Carbon Public Market nga kanhi binilanggo gipusil-patay sa riding in tandem sa Dalan MC Briones, Dakbayan sa Sugbo, pasado alas 3 sa kaadlawon sa Lunes, Hulyo 22, 2024
Ang biktima giila nga si Maricel Patambag, lumad nga taga lungsod sa Pinamungajan, apan kasamtangan nga nagpuyo sa Brgy. Ermita, Dakbayan sa Sugbo.
Sigon sa iyang kapuyo nga samtang padung na sila manghipos sa ilang baligya nga prutas, kalit lang niabot ang duha ka mga lalaki nga nagsakay sa motorsiklo.
Ang angkas niini maoy nikanaug ug nipusil sa biktima makaupat ka mga higayon.
“Kalit kaayo kay naa koy kustomer. Paglingi namong duha naa nay buto duol kaayo sa akong nadunggan, mura kog nabungol. Pagbuto ayha nako nakabantay nga siya diay ang gipusil kay nahagba na man siya,” asoy sa kaipon sa biktima, kinsang ngalan gipugngan.
Namatay diha-diha dayon ang biktima tungod sa mga samad pinusilan sa ulo, buko-buko ug lawas gikan sa kalibre .45 nga pistola base sa nakuha mga mga basiyo sa bala.
EX-CON
Gitug-an sa iyang kapuyo nga niadtong Hunyo 11, 2024 lang nakagawas sa Cebu City Jail si Maricel sa kaso niini sa ilegal nga drugas.
Human nakagawas, nakahukom kini nga maninda og mga prutas sa Carbon Market apan wala siya masayod unsay motibo nganong gipatay ang biktima.
Sa imbestigasyon sa Carbon Police Station nasuta nga dili lang duha ang killers, sanglit dunay laing tawo nga nagmotorsiklo nga kauban nga niabot ug niuban usab kini og sibat.
Si Police Major Philip John Libres, hepe sa Carbon Police Station, nagkanayon nga wala pa silay suspek sa pagkakaron sanglit nagpadayon pa sa ilang pakisusi ang mga imbestigador.
Matod ni Libres nga sa tulo ka mga killer, walay nakakita sa nawong tungod kay naka facemask ug naka jacket nga dunay hood.
Duha ka mga anggulo ang ilang gipangsubay sa pagkakaron. Kini mao ang personal nga atraso ug ang ilegal nga drugas tungod kay nabilanggo na kini ug niadtong Hunyo lang nakagawas human nakapiyansa.
“Wala pa tay suspect ani pero nadakpan naman ni sa drugs. Mag focus ta sa illegal drugs ug personal nga motive. Wala ba siyay nakabangi before considering nga June 11 pa siya nakagawas,” matod ni Libres.
Sa wala pa ang insidente, duna pay naka text sa biktima nga dili lang una siya patindahon sa Carbon kay dunay nangita kaniya.
Dinhi nagtuo si Libres nga ang nag text nasayod kinsa ang naghulga sa kinabuhi sa biktima.
Nanguha na karon og mga CCTV video ang kapulisan sa Carbon aron pag-ila sa mga killer. / AYB