Nakalingkawas ang Phoenix Super LPG Fuel Masters sa uwahing panghudlat sa Rain or Shine Elasto Painters aron iposte ang sikit nga 99-98 nga kadaugan sa Philippine Basketball Association (PBA) Season 48 Commissioner’s Cup sa Ynares Sports Center, Antipolo sa Sabado sa gabii.
Mibirada ang Fuel Masters sa fourth quarter gamit ang 16-0 run apan nibalos ang Elasto Painters nga maoy nakapakulbahinam sa ending sa duwa.
Nisaka ang Phoenix sa 2-1 (win-loss) rekord ug nakabalik kini sa win column human gipilde sa league-leading Magnolia sa miaging semana.
Ang Elasto Painters, sa ilang habig, wa pa gihapon nakatilaw og daog sulod sa tulo ka duwa.
Si Jonathan Williams mikulit og 29 puntos ug nilangkat pa og 18 ka rebounds para sa Phoenix, samtang ang iyang teammate nga si Jason Perkins nidugang og 14 puntos gikan upat ka tres lakip na ang two-pointer nga maoy nakapasugod sa fourth quarter run.
Nidugang si Tyler Tio og 13 puntos, si Sean Manganti mitunol og 10 puntos, ug si Kenneth Tuffin miamot og 9 puntos ug 12 ka rebounds.