GIPASALIG sa Malacañang ning Biyernes, Hunyo 27, 2025, nga andam ang gobiyerno sa paghatag og fuel subsidies sa mga drayber sa pampublikong mga sakyanan, mga mag-uuma, ug mga mananagat kon mosaka na sab ang presyo sa krudo sa kalibutan.
Matod ni Palace Press Officer Claire Castro nga ang paghatag sa mga subsidy magdepende sa aktuwal nga paglihok sa merkado.
Dugang pa niya nga padayon ang pag-monitor sa gobiyerno sa kahimtang sa Israel ug Iran kabahin sa tensyon tali sa duha ka mga nasod sa Middle East.
Sa usa ka press briefing sa Palasyo, gipasaligan ni Castro ang publiko nga ang kaayuhan sa mga trabahante sa transportasyon, mag-uuma, ug mananagat usa sa mga prayoridad ni Presidente Ferdinand R. Marcos Jr.
“May mga pagkakataon po siguro na ganitong klaseng sitwasyon ay hindi po agad makakapag-decide ang pangulo dahil depende po ito sa nagiging sitwasyon sa kasalukuyan,’ asoy ni Castro.
“Pero patuloy pong nagmo-monitor ang pamahalaan kung ano ba ang nangyayari sa isyu sa Israel at Iran.’
Gitataw ni Castro nga sa pagkakaron, dili pa kinahanglan ang fuel subsidy tungod kay ang presyo sa krudo sa kalibutan niabot pa lang og USD65 ngadto sa USD68 matag baril.
“So, hindi po agad ito mati-trigger. Pero tandaan po natin, kung anuman po ang maitutulong sa kakayanan at naaayon sa batas natin at sa rules, hindi naman po ito ipagkakait ng pamahawlaan,’ pasabot ni Castro.
Ang gobyerno nagahin og P2.5 billion alang sa Fuel Subsidy Program (FSP) aron pagtabang sa kapin sa 1.1 million nga mga mamumuo sa transportasyon kon ang presyo sa lana sa kalibutan molapas sa US$80 matag baril.
Ang programa makabenepisyo sa gibanabanang 1,132,407 ka mga indibidwal, lakip na ang 258,712 ka mga operator ug drayber sa PUV, 723,695 ka mga drayber sa traysikol, ug 150,000 ka mga drayber sa ride-hailing application.
Nauna nang gisulti ni Marcos nga dili pa kinahanglan i-implementar ang FSP tungod kay wala pa man mosaka ang presyo sa lana sa kalibutan. / PNA