Gisaway ni Senador Pia Cayetano ang lakang sa Cebu Normal University (CNU) sa pagpahigayon og full online classes sa main campus niini.
Subay sa giluwatan nga pamahayag ngadto sa mga tigbalita sa Lunes, Agusto 4, 2025, gihulagway ni Cayetano nga nagdala og dili maayong serbisyo ngadto sa mga tinun-an ang maong lakang.
Matod sa senador nga “unacceptable” ang pagpatuman sa kompletong shift sa tunghaan ngadto na sa online class.
Iyang gidugang nga ang maong lakang susama ra og gipasagdan ang mga tinun-an.
Gihimug-atan ni Cayetano ang usa ka pagtuon sa Cebu Technological University (CTU) nga nagtuong nag-atubang og dakong hagit ang mga tinun-an nga hinay ngadto sa wala nay internet access ug kuwang sab og digital skills.
Iyang gidugang ang dakong potential ug negatibong epekto niini sa mental ug physical health sa mga tinun-an.
Gikuwestiyon sa senador ang palisiya nga gipatuman sa presidente sa tunghaan kon nganong giingong walay board approval o ba kaha panahom gikan sa mga tinun-an, ginikanan, ug uban pang stakeholders.
Subay niini, nanawagan ang senadora sa Commission on Higher Education (CHED) aron sugdan ang pagpahigayon og pormal nga imbestigasyon sa hitabo.
Gilauman nga moduso og resolusyon si Cayetano pagsiguro nga masusi ang mga academic institutions nga nahisubay sa insaktong governance standards.
Kahinumdoman nga nipatuman sa full online class ang tunghaan tungod sa pagpadayon sa construction sa sulod subay sa tinguha nga makab-ot ang smart campus.
Giingong unang gikabalak-an ni Dr. Daniel Ariaso Sr. nga ibalik ang moabot P2 bilyunes nga pundo kon dili mapatuman ang proyekto niini.
Subay sa uwahing kalambuan, nipahibalo na ang tunghaan nga ipatuman niini ang 75 porsiyento nga physical classes ug 25 porsiyento nga online class sugod Septiyembre 1, 2025.
Sa pagkakaron wala pa’y giluwatang pamahayag si Ariaso kalabot niini. / ANV
