Patay nang niabot sa tambalanan ang usa ka mekaniko nga nagmaniho sa usa ka motorsiklo sa dihang siya giingong maoy nidasmag sa usa ka Ceres bus alas 5:30 sa buntag sa Sabado, Pebrero 10, 2024 sa may national highway sa Sagay , Borbon, amihanang Sugbo.
Ang biktima giila nga si Erick Gualin, 22 , ulitawo, taga Sityo Lumboy, Brgy. Ilihan, Tabogon.
Ang drayber sa bus giilang si Ronald Arranchado , 33 ,minyo, taga Brgy. Tominhao Daanbantayan, amihanang Sugbo.
Sa interbyo sa Superbalita Cebu sa hepe sa kapulisan sa Borbon nga si Police Capt. Gerry Antopina, nasayran nga ang bus gikan sa Daanbantayan padung sa siyudad sa Sugbo.
Apan pag-abot sa maong dapit, si Gualin nga kasugat sa bus, giingong kalit nga nisimang sa lane nga gisubayan sa bus nga niresulta sa panagbangga.
Gitataw ni Antopina nga ang bus lang ug motorsiklo ang nalambigit sa aksidente, way labot ang usa ka van nga naa sa hulagway sa dapit nga nahitaboan.
ARGAO
Usa ang naangol human nadasmag sa koral sa usa ka balay ang freezer van sa alas 4 sa kaadlawon sa Sabado sa Sityo Baybayon, Brgy. Talaga, Argao, habagatang Sugbo.
Ang drayber sa van giingong nilihay sa portion sa karsada nga giayo apan wa dayon mabantayi hinungdan nga nadasmag sa koral nga kongkreto sa balay ni Fr. Joeryl Chan.
Matod ni barangay konsehal Roldan Camson sa Talaga nga ang pahinante sa van nga iyang giila nga si Benidicto Bayoja, 42, taga sityo Monggos, Paknaan, dakbayan sa Mandaue, naangol sa hitabo kay napiit samtang naglingkod sa front seat.
Dali siyang gidala sa tambalanan samtang ang drayber sa van nga si Lloyd Montemayor Zapanta, 38, taga Brgy. Tabok, Mandaue City, wa maunsa.
Matod sa kapulisan sa Argao Police Station ubos sa ka manduan sa ilang hepe nga si Police Major Ivy Martin Bartolome, ang drayber sa freezer van may karga nga mga cake gikan sa Mandaue City nga ipang-deliver sa mga lungsod sa Santander, Oslob, Boljoon, Alcoy ug Dalaguete.
Pag-abot sa kurbadahong bahin sa karsada, adunay nagpadayon nga road repair nga wa dayon niya nabantayan.
Iya kini nga gilihayan apan wa na siya naka control sa manubela hinungdan nga nadasmag siya sa koral.