Gagmay ra’ng butang sa sementeryo nasakmit

DAGKUTANAN: Pipila ka mga tawo nanagkot og kandila sa ilang pagduaw sa Queen City City Memorial Gardens sa Kalagkalag. / KAISER JAN FUENTES
DAGKUTANAN: Pipila ka mga tawo nanagkot og kandila sa ilang pagduaw sa Queen City City Memorial Gardens sa Kalagkalag. / KAISER JAN FUENTES

Ang Cebu City Police Office (CCPO) niingon nga gagmay lang nga mga butang nga gigamit sa pagpanglimpyo sa mga lubnganan sama sa “guna” o mga sundang alang sa mga sagbot ug silhig ang nasakmit atol sa pagsaulog sa All Soul’s Day sa Huwebes, Nobiyembre 2 sa dakbayan sa Sugbo.

Malinawon ug hapsay usab ang selebrasyon karong tuiga.

Matod ni Lieutenant Colonel Janette Rafter, information officer ug deputy city director for operations sa CCPO, mokabat sa 16,500 ka mga tawo ang gibana-bana nga naa sa 21 ka mga sam-ang sa alas 10 sa buntag sa Huwebes sa dakbayan sa Sugbo.

“Sa Calamba, naay mga ginagmay kana rang mga pang limpyo nga gi pang ban ang na confiscate,” niingon si Rafter.

Matod niya nga gagmay ra nga mga gamit sa pagpanglimpyo ang nasakmit sanglit ang pagpanghawan sulod sa mga sementeryo gitugot lang hangtod sa Oktubre 31 sa mga tagdumala.

Gipasalamatan usab ni Raf­ter ang publiko sa ilang kooperasyon.

“Mapasalamaton gyud ta sa kooperasyon, naminaw atong katawhan sa atong hangyo nga dili na magdala og mga hinagiban diha or anything nga maka hamper sa pag flow sa atong traffic diha sa atong mga entrance,” niingon si Rafter.

Si Rafter, sa buwag nga pakighinabi niadtong Nobiyembre 1, nagkanayon nga base sa assessment ni CCPO Director Colonel Ireneo Dalogdog, direktor sa CCPO, hapsay ang sitwasyon sa mga sementeryo.

“Ang atong mga sementeryo sa pagkakaron nagpabilin nga klaro ug hapsay,” niingon si Rafter.

Giawhag usab niya ang publiko nga magtinabangay ug magmatngon sa kainit sa pagbisita sa sementeryo ug girekomendar sa mga tigulang nga mobisita sa hapon.

Si Rafter miingon usab niadtong Nobiyembre 1 nga ang gidaghanon sa mga tawo nga ningbisita mas gamay kaysa sa miaging tuig nga ang hinungdan mahimong ang publiko ningbisita sa mga sementeryo sa mga adlaw sa wala pa mopahimulos sa taas nga weekend.

TRAPIKO

Si Konsehal Rey Gealon, TMC chairman, nitug-an sa SunStar Cebu niadtong Nobiyembre 1, 2023 nga ang tanang traffic enforcer sa Cebu City Transportation Office gipakatap sa pagdumala sa dagan sa trapiko subay sa giaprobahan nga traffic management plan sa TMC. Si Gealon niingon nga kapin sa 600 ka personnel ang gipakatap sa mga importanteng lugar.

Matod pa ni Gealon nga mao kini ang mga lugar diin gipakatap ang mga traffic personnel:Carreta, Calamba, Pardo, Queen City Memorial Gardens, Labangon, Cebu Memorial Park, Chinese Cemetery, Golden Haven, ug Veterans Cemetery. / RJM

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph