Tinguha sa Association of Southeast Asian Nations (Asean) states nga mas palambuon ang local micro, small ug medium enterprises (MSMEs) aron maseguro nga dili lang ang dagkong mga enterprise ang molambo lakip sab ang lokal nga level.
Si Department of Trade and Industry (DTI) Undersecretary Allan Gepty nagkanayon nga gikinahanglan nga makasikad ug maseguro sab ang paglambo sa mga gagmay’ng negosyo nga makaabag sa nagpadayong krisis nga giatubang sa Middle East.
“One of the important ... trade agenda of Asean is inclusivity and that includes, integrating micro, small and medium enterprises to the global value chain. And one way to do that is for them to be given enhanced market access in the region,” asoy ni Gepty sa Mayo 7, 2026.
Pasabot nga gawas sa pagpalambo sa local businesses, lakip sa gitinguha niini ang pag-export sa laing nasod ug ang pag-connect sa laing mga kompaniya nga kabahin sa mas dakong value chain nga magbukas og dugang mga trabaho ug dugang business opportunities.
Ubos sa chairship sa Pilipinas, prayoridad niini ang pagmuntar og Asean Center excellence for MSMEs aron pag-integrate sa tanang programa, mga proyekto, ug inisyatiba sa matag rehiyon.
Aron masegurong matuman kini, gilantaw sab ang paglagda og Digital Economy Framework Agreement, pag-establisar sa pamaagi alang sa regional payment interconnectivity. / ANV
