Base sa report sa Philippine National Police (PNP) nga adunay 18,089 ka kaso sa pag-abuso sa mga bata nga may kalabutan sa sexual exploitation ug pagpanglugos niadtong 2024, ug gamayng pagkunhod nga kapin sa 660 ka kaso itandi sa sa 18,756 nga na-record niadtong 2023.
Kini gibutyag ni PNP - Council for the Welfare of Children Undersecretary Angelo Tapales, sa press briefing sa Philippine Information Agency niadtong Biyernes, Pebrero 7, 2025.
Matod ni Tapales nga bisan kon ang kinatibuk-ang ihap sa mga kaso (nga wala pa maglakip sa datos sa ubang ahensiya sa balaod) mikunhod, kini nagpabiling taas ug dili angay isipon nga positibo nga kalamboan.
Iyang gidugang nga ang pagpang-abuso sa mga bata, pagpanglugos, ug law-ay nga binuhatan mao ang tulo ka nag-unang mga paglapas sa katungod sa bata sa nasud.
Gibutyag usab ni Tapales nga ang kataas sa kaso sa online child abuse ug pagpanghimulos sa internet nagpabiling dako nga kabalaka, nga adunay kapin sa 2.70 milyones ka cyber tipline leads nga na-report sa Department of Justice.
Si Yhelen Agus, pangulo sa National Bureau of Investigation (NBI) violence against women and children nagkanayon nga ang mga insidente sa sexual abuse sa kabataan nagkagrabe ug gikabalak-an nga adunay mga na-report nga kaso nga naglakip sa mga bata nga nag-edad og 5 anyos.
Sigun pa ni Agus nga dili lang limitado sa pisikal nga pagpang-abuso, ang maong mga kaso naglakip sab sa cyberspace, diin ang mga biktima mga menor de edad.
Mipadangat siya og panawagan sa mga miyembro sa pamilya ug mga tig-atiman sa mga bata nga bantayan pag-ayo ang ilang mga anak ug magpabiling mabinantayon sa mga tawo nga nagpalibot kanila, kay ang uban sa mga nagbuhat sa krimen mahimong kaliwat, amahan sa bana, o bisan pa ang ilang kaugalingong amahan. /DPC