Gamotor sa CSCR naligsan sa trak, tipi

GITABUNAN: Ang seaman nga gitabunan namatay diha-diha human naligsan ang iyang ulo sa usa ka trailer truck nga puno og kargamento nga semento sa Cebu South Coastal Road (CSCR), Barangay Dumlog, dakbayan sa Talisay.
GITABUNAN: Ang seaman nga gitabunan namatay diha-diha human naligsan ang iyang ulo sa usa ka trailer truck nga puno og kargamento nga semento sa Cebu South Coastal Road (CSCR), Barangay Dumlog, dakbayan sa Talisay. Gikan sa Fb post sa Ct-Toda

Napisat ang ulo sa usa ka seaman kay naligsan sa trailer truck sa Cebu South Coastal Road (CSCR) sa Barangay Dumlog, dakbayan sa Talisay, alas 8:50 sa buntag sa Huwebes, Pebrero 22, 2024.

Ang biktima giila nga si Bobby Moniba, 27, minyo, taga Barangay San Isidro, lungsod sa San Fernando.

Samtang ang drayber sa trailer truck nga si Ondo Kilme, 44, taga Barangay Taloot, lungsod sa Argao, gitanggong sa kapulisan sa Talisay.

Sa imbestigasyon sa kapulisan nasuta nga ang biktima nagsakay iyang motorsiklo paingon sa dakbayan sa Sugbo.

Ang trailer truck nagsubay usab sa samang direksyon gikan sa Apo Cement sa dakbayan sa Naga nga puno sa kargang sinako nga semento.

Matod ni Kilme, nga paingon siya sa inner lane apan wala siya nakakita sa biktima nga nagmotorsiklo.

Nagtuo siya nga kini nisuway og overtake nga wala niya makit-i. Sa pagtan-aw niya sa side mirror, ang motorsiklo natumba na.

Dugang niya, wa dayon nakahunong ang iyang sakyanan tungod sa kabug-at sa karga nga mga sinakong semento niini.

Nasuta niya nga napisat ang ulo sa biktima kay nalatayan sa panguwahian nga tuo nga mga ligid.

Nasuta usab sa imbestigasyon nga sa right lane niagi ang biktima aron makalusot apan nagkasaghiray sa trailer truck hinungdan nga natumba ang motorsiklo.

Pagkabunal sa biktima sa iyang ulo sa dan, nalatayan kini sa ligid sa trak hinungdan nga napisat.

Si Patrolman Alexis Vincent Gainsan sa Traffic Division sa Talisay City Police Station nagkanayon nga kasamtangang gitanggong ang drayber sa trakk.

Atol ning pagsuwat, gipaabot sa kapulisan ang kabanay sa biktima alang sa pagpasaka og tukmang kaso batok sa drayber sa trak.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph