Pabiling misteryuso kadtong tunnel nga nadiskubrehan sa mga sakop sa Argao police sa Barangay Jampan, Argao, Cebu sa dihang pagbalik sa mga pulis sementado na ang ganghaan niini.
Gibalikan, Miyerkules, Agusto 21, 2024, sa mga polis nga gipangulohan ni Police Major Janus Giangan ang balay niadtong ilang gika-engkuwentro nga wanted, bitbit sa warrant of arrest batok ni Jonathan Comaling.
Si Comaling nag-atubang og kasong paghupot og dili lisensiyado nga armas
Apan misukol ug nahitabo nga pinusilay Martes, Agusto 20 nga miresulta sa kamatayon ni Jay Rodel delos Reyes Comaling, ig-agaw ni Jonathan.
Nakurat ang mga polis sa dihang ang tunnel nga ilang untang siksikon ang nasira na pinaagi sa pagsemento sa ganghaan niini.
Dako ang pagduda sa kapulisan nga posible hideout kini sa mga suspetsado o bodega sa mga illegal nga drugas o armas.
Samtang ang pamilya sa napatay nga si Jay Rodel mitug-an sa Superbalita Cebu nga wa mosukol sa mga polis apan matod pa gituyo kini sa pagpatay.
Giangkon sa kabanay nga wa magpaila nga nalambigit sa ilegal nga drugas si Jay Rodel ug giingong wa gyud mopatuo bisan sa ilang pagbadlong.
Padayon nga gipangita ang managsuong Jonathan ug Joel Comaling nga dali nga nakaipsot atol sa engkuwentro.
Mi-request na sab og back-up ang Argao police aron nga susihon ang sud nga bahin sa tunnel nga dali nga gipasirhan. / DVG