MALAUMON ang Dallas Mavericks nga makabalik sa National Basketball Association (NBA) Finals sa usa ka dayag nga rason – si Cooper Flagg.
Usa ka adlaw human gipili sa Mavericks si Flagg isip No. 1 overall sa rookie draft, ang team management ningpadayag sa ilang kahinam ug niini pa lang ka sayo, naghunahuna na sila sa kampyunato.
Ang Mavericks katapusang nakaangkon og kampyunato niadto pang 2011 sa panahon ni Dirk Nowitzki. Mao ra kini ang bugtong kampyunato sa Mavericks.
Katapusan silang nakasulod sa NBA Finals niadtong 2023-24 season apan yano silang gipangpusgay sa Boston Celtics, 4-1.
Sa paghiabot ni Flagg, kinsa naila nga maka-pa-ukyab nga all-around player, dili malilong nga usa ang Mavericks sa makonsiderar nga makaangkon sa korona sa umaabot nga 2025-26 season.
Ikatambabayong ni Flagg sila si Anthony Davis, Klay Thompson, Dereck Lively II, ug Kyrie Irving sa pagpangulo sa Mavericks.
Hinuon, si Irving gilaumang makapalta pa og mga duwa sa mag-unang duha ka mga buwan sa 2025-26 season gumikan kay padayon pa kining nagpaalim sa iyang angol (torn ACL).
“I think it’s win now. It’s also win in the future,” matod ni GM Nico Harrison atol sa post-draft news conference sa Dallas nga napatik sa AP News.
“Eventually it’s going to be Cooper’s team. We don’t know when that transition will happen. So I think it’s win now and then set yourself up to win in the future as well.”
Sila si Davis ug Irving parehong adunay player options sa 2027-28 apan gituohang andam kining magpabilin sa Mavericks sulod sa dugay nga panahon kaabag si Flagg, kinsa nag-edad pa lang og 18.
“We had a great week. Obviously, there’s a lot of stuff we can’t say. But we were able to have initial conversations with a couple of our guys. And we feel good about the outcome of that,” dugang ni Harrison.
Si Flagg mao pa lang ang ikaduhang No. 1 overall pick sa kasaysayan sa Mavericks sunod ni Mark Aguirre niadtong 1981. / Gikan sa wires