Hatagan og prayoridad ni Mayor-elect Nestor Archival ang lawom nga pagtuon sa panudlanan sa Dakbayan sa Sugbo ug ang pagbantay sa digital data sa higayon nga mopuli na siya sa pagdumala sa City Hall.
Kini'ng maong isyu maoy gipatugbaw ni Archival atol sa unang opisyal nga transition meeting uban ni sa team ni Garcia sa Lunes, Mayo 26, 2025, sa Mayor’s Conference Hall.
Gipadayag ni Archival ang iyang katawgbaw sa unang tigom ug nidayeg sa pakigtambayayong ni Garcia.
“It was a very good meeting. Mayor Raymond is very cooperative in his pronouncements,” nagkanayon si Archival.
Unang giseguro ni Archival sa pagsusi ang sitwasyon sa panudlanan sa siyudad ug ang kahimtang sa mga empleyado.
“As much as I wanted nga naa gyud na tanang tao but ang problema is unsaon nato pag-continue if there are no funds nga nagsuweldo. We don’t know yet, unless makahibalo ta unsa’y status sa atoang panudlanan,” matod niya.
Usa sa kabalaka nga gitumbok ni Archival atol sa meeting nga mapapas ang mga datos, ug gihimo nga sanglitanan ang niagi nga nangawagtang ang listahan sa mga scholar.
Nanawagan siya sa mga empleyado nga ipreserbar ang ang tanang mga dokumento ug computer data, ug nitumbok sa kamahinungdanon niini, “not just for you but it’s for the good of everybody.”
Sa buwag nga interview, si Garcia nipahibalo sa gidaghanon sa mga empleyado sa City Hall ug sa panudlanan sa siyudad.
Sa kasamtangan, ang City Hall dunay 1,582 ka mga regular employee, 2,962 ka mga kaswal, 2,668 ka job order personnel, ug 187 ka mga coterminous staff.
Nagtuo si Garcia nga kini'ng maong gidaghanon igo na kaayo ug way problema sa pagpanweldo sa mga empleyado.
Gimanduan ni Garcia ang accounting office sa paghimo og comprehensive breakdown sa budget sa Dakbayan sa Sugbo.
Si Garcia subling nitataw nga komitido siya sa paghimo og hapsay nga transition ug niingon, “I want this administration to succeed, because the success of this administration is the success of the City of Cebu.”
Nitanyag si Garcia ug direktang komunikasyon ngadto ni Archival kon dunay mga kakulian sama sa pagkapapas sa mga data nga maoy kumon kaayo nga mga problema sa transition base sa kaugalingon niya nga kasinatian.
Samtang gipahibalo ni Archival nga komitido siya alang sa usa ka transparent administration ug nisaad nga mohatag og opisina sa media ug mopahigayon og senemana nga press conferences aron sa pagpahibalo sa publiko sa mga panghitabo sa siyudad.
Si Archival mobutyag sa iyang mapilian nga ibutang nga mga department head sa sunod semana. / JPS