Giklaro ni Cebu City Mayor Raymond Alvin Garcia nga wala magdoble ang pundo sa gisugyot nga elevator sa city hospital ug ang karaan nga budget sa pagtukod niini, kabahin sa gi-terminate nga contract sa miaging administrasyon.
Niadtong Lunes, Abril 28, 2025, gitubag ni Garcia ang mga isyu sa Cebu City Medical Center (CCMC) human dunay konsehal nga nikuwestyon sa Department of Engineering and Public Works (DEPW) tungod sa giingong pagdoble sa pagpundo sa elevator.
Atol sa regular session niadtong April 23, 2025, usa sa gituki ang pagtukod sa elevator sa public hospital nga gikatahong gipundohan sa "Piso Mo, Hospital Ko", usa ka fund-raising campaign nga nagsugod Oktubre 2013 ngadto sa Nobiyembre 2014.
Nitumaw ang pangutana kon nganong ang pagtukod sa elevator nalakip sa kontrata sa M.E. Sicat Construction ug C.E. Padilla Construction Inc.
Ang Piso Mo, Hospital Ko campaign nakatigom og P16 milyunes pinaagi sa mga donasyon nga gihulog sa mga container nga gipahimutang sa City Hall, mga merkado, eskuylahan ug commercial establishments.
Matod ni Garcia, ang kontrata uban sa C.E. Padilla Construction Inc. alang lang sa elevator structure ug ang shaft.
“Ang nagasto sa ‘Piso Mo, Hospital Ko,’ ang na-purchase ra ato was just the elevator carrier. Walay labot sa elevator shaft or mechanical whatever that had to be prepared. So, there is no double funding,” matod ni Garcia.
Ang C.E. Padilla maoy nagdumala sa katukoran sa Phases 1 ug 2 sa CCMC nga dunay kinatibuk-ang budget nga P399,976,345.
Ang Phase 3, kantidad og P99.72 milyunes nga gi-award sa C.B. Garay Philwide Builders.
Samtang ang Phase 4, mokantidad og P907.99 milyunes ug gi-award sa M.E. Sicat Construction joint venture.
Apan ang kontrata uban sa M.E. Sicat gitapos niadtong Nobiyembre 9, 2022, ni dismissed mayor Michael Rama tungod sa nagkadaghan nga sayop sa trabaho.
Ang kontrata uban sa M.E. Sicat maglakip unta sa elevator structures sa upper floors sa ospital.
Sa pagkakaron, duna lay usa ka elevator ang operational sa CCMC nga maghatag og access sa Operation Smile sa seventh floor. / JPS