Gipasalig ni Mayor Raymond Alvin Garcia nga wala kinahanglana nga magdeklarar ang Dakbayan sa Sugbo og public health emergency bisan nisaka og 123 porsiyento ang kaso sa dengue.
Sa Pebrero 10, 2025, ang siyudad nakarehistro og 223 ka mga kaso sa dengue, taas kaayo nga pagsaka gikan sa 100 ka mga kaso sa miaging tuig.
Apan giklaro ni Garcia nga bisan pa sa taas nga numero, mas ubos gihapon kini kaysa sa mga peak months sa 2024 diin ang mga kaso nakaabot sa 496 sa Nobiyembre ug 328 sa Disyembre.
“Kon itandi nimo kini sa Agusto, Septiyembre, Oktubre, Nobiyembre, ug Disyembre sa miaging tuig, ang atong mga kaso sa dengue niubos.Mao nga wala koy nakita nga rason sa pagtawag og public health emergency,” niingon si Garcia sa usa ka press conference niadtong Lunes, Marso 10, 2025, sa City Hall.
Ang usa ka public health emergency magtugot sa siyudad nga makagamit sa pundo sa kalamidad aron batukan ang dengue.
Sa 2024, ang bulan sa Agusto nakarehistro og 790 ka mga kaso, 1065 ka mga kaso sa Septiyembre, ug 971 ka mga kaso sa Oktubre.
Sa Enero 2025, ang mga kaso nga nakarehistro 206, 121.50 porsiyento nga pagtaas gikan sa 93 sa miaging tuig.
Gitataw ni Garcia nga bisan taas ang kaso nga nakarehistro sa Pebrero, apan ang siyudad nakabuhat na og mga intervention.