Makonsiderar man tuod nga dakong kalampusan ang kasaulogan sa Sinulog 2025 apan giklaro ni Cebu City Mayor Raymond Alvin Garcia nga aduna pa’y mga aspeto nga angayang tutokan aron mas mapalambo kini.
Atol sa post-event debriefing niadtong Biyernes, Enero 24, 2025, si Garcia, kauban ang mga opisyal sa Sinulog Foundation, Cebu City Police Office, ug ubang stakeholders, nagbalik-lantaw sa grand parade ug ritual showdown niadtong Enero 19, 2025.
Usa sa mga punto nga gitutokan ni Garcia mao ang dagan sa street parade sa kasaulogan, nihakot og kapin sa upat ka milyon ka mga tawo, 45 contigents, ug 61 floats.
Matod ni Garcia, kinahanglang masulbad ang mga kakulian sama sa pagkalangay sa parada tungod sa paggamit og karaan ug wa ma-maintain og tarong nga mga sakyanan sa floats, wala’y saktong koordinasyon sa pagpasundayag sa contigents sa gawas sa judging stations ug pagkabalda sa judging areas diin pabalikon ang contigents sa pagsayaw.
Gisugyot ni Garcia nga adunay standard nga ipatuman sa mga sakyanan nga gamiton sa floats diin 2020 model o mas bag-o pa ang tugotan ug pagpakatap og standby mechanics ug trucks sa mahinungdanong mga lugar aron paglikay nga malangan ang parada.
“What is the reason nganong naaberya ang floats? Perhaps they were using old-model trucks or those in poor condition,” pasabot ni Garcia.
Girekomendar sab niya nga ipatuman ang “moving routine” sa contingents aron padayon ang pag-irog sa parada.
“Naay mga contingent nga dili judging station pero mo-perform og full routine. Okay ra man ko ani, but naa lang untay moving routine para malipay ang crowd ug dili maapektuhan ang flow,” dugang ni Garcia.
Gitutokan sab niya ang pagkamahinungdanon sa obligasyon sa marshals aron makontrolar ang gintang sa matag contigent ug dagan sa parada.
“Marshals are very important to make the contingents move faster or look after the distance of the parade,” batbat ni Garcia.
Laing gihatagan og importansya ni Garcia mao ang pag-install og speaker systems sa rota alang sa mahinungdanong mga anunsyo. Bisan sa mga kakulian, nagpasalamat gihapon og dako si Garcia sa tanang mga nakatampo sa kalampusan sa kasaulogan.
“The Sinulog should be attributed to all who helped, including the Philippine National Police, force multipliers, auxiliary forces, barangay captains, tanods, Philippine Armed Forces, Coast Guard, BFP (Bureau of Fire Protection), City Hall employees, and Sinulog Foundation,” pasabot ni Garcia.
Sa laing bahin, gidayeg ni Garcia ang mga gitahasan sa crowd management.
“Considering it was four million people, crowd control was excellent. Wala tay untoward incidents like stampedes, which only means nga ang crowd control was not only fair or good but it was really excellent,” matod ni Garcia.
Hinuon, nagtuo siya nga aduna pa’y luna alang sa mas dugang kalambuan.
Gidayeg sab ni Garcia ang gipakitang pagkamatinumanon ug kooperasyon sa mga tawo nga ningsaksi sa kasaulogan sa pagmintinar sa hapsay ug kalinaw.
“Ang Cebuanos kay motuo og authority; mahadlok sa polis. That is why generally safe gyud atong Sinulog,” asoy ni Garcia. / CDF