Gipasakaan og reklamo si Cebu City Mayor Raymond Alvin Garcia ug hepe sa kapolisan tungod sa pagtugot sa mga kalihukan sa sabong sa upat ka managlahing higayon sulod sa usa ka hotel sa South Road Properties.
Ang kanhi pangulo sa Cebu City Local School Board sa Department of General Services Kristian Hassamal nisang-at sa reklamo sa Office of the Ombudsman batok kang Garcia ug P/Col. Antonietto Cañete.
Gitumbok sa reklamo mao ang sabong sulod sa Nustar Resort & Casino, dason sa reklamante, dili akreditado o lisensyado isip cockpit area.
Si Hassamal, naila nga kaalyado ni kanhi Cebu City Mayor Michael Rama kinsa adunay tensyon sa incumbent city mayor, nangatarungan nga sila si Garcia ug Cañete guilty sa Grave Misconduct ug naghinaot nga pahamtangan og preventive suspension ug dismissal sa katungdanan.
Sumala sa reklamo, kini subay sa Section 24 sa Republic Act No. 6770 ug Anti-Graft and Corrupt Practice.
Subay sa 11 ka pahina nga reklamo nga pinetsahan og Nobiyembre 18, 2024, si Hassamal niingon nga gituyo ni Garcia nga gibaliwala ang legal nga proseso human niisyo og Letters of No Objections (LONOs), hinungdan sa pag-isyu og special permit sa Ox KBDF Gaming, ang organizer sa cockfighting event nga gipahigayon sa hotel niadtong Abril 21, Mayo 23-24, Agusto 27-29, ug Oktubre 11-18, 2024.
Base sa cockfighting laws sa national ug city ordinance, si Hassamal niingon nga ang maong kalihukan kinahanglang himuon lang sa lisensiyado nga cockpit arena ug kini kinahanglang ipahigayon sa adlaw nga Dominggo, legal holidays, local fiesta, lakip nga dili kini himuon lapas sa alas 10 sa gabii gawas lang kon dunay special permit gikan sa Gamefowl Commission, samtang dili usab kini molapas sa tulo ka adlaw.
Si Garcia, gikontak sa SunStrar Cebu kagahapon, Disyebre 1, apan niingon nga dili una mohatag og komenraryo samtang wala makakupot og kopya sa reklamo. / EHP