Garcia mihangyo sa mga tag-iya sa yuta

Cebu Governor Gwendo­lyn ‘Gwen’ Garcia. (File photo)
Cebu Governor Gwendo­lyn ‘Gwen’ Garcia. (File photo)

Pormal nga gihangyo ni Cebu Governor Gwendolyn Garcia ang 63 ka mga lot owner nga nanag-iya sa kinatibuk-an nga 22.5 ektaryang luna nga ibaligya ngadto Kapitolyo ang ilang mga propriedad alang sa pagpalambo sa airport sa isla sa Bantayan.

Gipahibawo sa kagamhanan nga atol sa tigom nga gihimo tali sa mga lot owner, gipasabot sa gobernador ang tumong ug katuyuan nganong paliton sa Kapitolyo ang ilang mga luna.

“Ang atong gilantaw nga kining Bantayan mahimong world class tourist destination,” matod ni Garcia atol sa tigom nga gitaho sa ilang social media platform.

Ang mga luna nahimutang sa Barangay Balidbid ug Okoy nga kasikbit sa luna sa Kapitolyo diin usab nahimutang ang Bantayan Island Airport.

Ang airport gidumala sa Mactan Cebu International Airport Authority (MCIAA) sukad niadtong Abril 2023.

Kini gilantaw isip dakong tabang sa mga turista ug bisita nga mapasayon ug mas mubo na ang biyahe niini nga anaa lang sa 25 minutos gikan sa Mactan Island paingon sa isla.

Una nang gisugyot sa kagamhanan ang pagpalit sa mga luna sa palibot sa airport aron mapatas-an pa ang runway niini ug maka-accomodate na og commercial flights gikan ug paingon sa maong isla.

Sa kasamtangan, adunay 1.2 kilometro’ng runway ang airport apan nasayran nga kuwang kini aron mabiyahian og commercial flights.

Gikinahanglan nga mapalapdan ug mapatas-an ang runway gikan sa 1.2 ngadto na sa 1.8 kilometro.

Ugaling mahinayon, gilauman nga sa sunod tuig aduna nay commercial flights nga masakyan gikan sa Ninoy Aquino International Airport (NAIA) paingon na sa isla sa Bantayan.

Giingong gikalipay hinuon sa lot owners ang gilantaw nga pagdagsa sa mga turista ug bisita sa isla.

Lakip sa ningtambong sa tigom sila si fourth district Board Member Carmela Franco, Santa Fe Mayor Ithamar Espinosa, Madridejos Mayor Romeo Villaceran, ug Santa Fe Municipal Assessor Engr. Rolando Fariolen.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph