Gilibkas na ni Cebu Governor Gwendolyn Garcia ang ban order sa mga buhi’ng baboy, butakal, baktin, boar semen, ug pork related products gikan sa Negros Oriental.
Subay sa uwahing executive order nga giluwatan ni Garcia sa Abril 25, 2024 gitugotan na nga makasulod ang mga produkto sa baboy gikan sa Negros basta mosunod sa mga rekisitos sa pagseguro nga luwas kini sa African swine fever (ASF).
Kahinumdoman nga sa Mayo 26, 2023, niluwat og kamandoan si Garcia sa temporaryong pag-ban sa pagsulod sa mga baboy tungod sa ASF.
Sa gitugot karon nga pagsulod, lakip sa rekisitos nga gikinahanglan ang Veterinary Health Certificate nga giisyu sa lisensyadong veterinarian; livestock handlers license; certification sa disease surveillance sa classical swine fever ug laing swine diseases gikan sa city o municipal veterinarian o agriculturist; negatibo nga resulta sa ASF test nga gikuha pito ka adlaw sa dili pa ang shipment; local shipping permit, concurrence sa shipment gikan sa provincial veterinarian, livestock transport pass, ug animal welfare registration alang sa live hogs.
Ingon man ang certificate nga nagpamatuod nga ASF-free na ang status.
Samtang alang sa mga frozen pork products, gikinahanglan usab ang Meat Inspection Certificate (MIC) alang sa mga locally sourced ug imported meat.
Lakip na ang certificate of acceptance gikan sa provincial veterinary office ingon man ang transport pass.
Gipasidan-an usab ang tanang livestock transport trucks ug reefer vans nga mag deliver sa mga baboy ug pork products sa probinsya nga morehistro sa opisina sa provincial veterinarian ug mosunod sa pito ka adlaw nga downtime period.
Ang kapulisan, Philippine Coast Guard, Cebu Port Authority, Mactan Cebu International Airport Authority ug tanang mga mayor gimandoan sa pagsunod sa maong mando. / ANV