Bisan national holiday niadtong Biyernes, Disyembre 8 tungod sa Feast of the Immaculate Conception, wa nipahuway si Gobernador Gwendolyn Garcia, nidalikyat siya sa pagduaw sa lungsod sa Tudela, mga isla sa Sugbo.
Nitambong ug nisaksi siya sa labing una nga Katunggan Festival, kanhi mas naila nga Balanghoy Festival, apan giusab kini ni Mayor Greman “Jojo” Solante.
Gituyo kini ni Solante aron mahatagan og gibug-aton ang lapad nga bakhawan sa lungsod nga duna nay centuries old nga punoan sa Bakhaw ug papel niini sa pagpanalipod sa kabaybayunan sa lungsod.
Matod sa taho sa Sugbo News, social media platform sa Kaptolyo, nga upat ang contingents nga ningsalmot nga naglakip sa Tribu Miyati, Tribu Pagatpat, Tribu Bakhaw ug Tribu Madaaigong Piag-ao.
Matag contingent dunay ilang kaugalingon nga festival queen.
Sa kalipay ni Garcia samtang nagtan-aw sa mga pasundayag, nihatag siya og P200,000 nga subsidy sa matag contingent.
Ang festival maoy highlight sa kapistahan sa lungsod pahinungod sa Our Lady of Immaculate Conception.