Gibana-bana nga niabot og 100,000 ka mga pasahero ang ningdagsa sa mga terminal nga gidumala sa Probinsya sa Sugbo sa Miyerkules, Marso 27, 2024.
Kini ang komon nga sitwasyon sa Cebu South Bus Terminal (CSBT) sa N. Bacalso Ave. ug Cebu North Bus Terminal sa North Reclamation Area sa dakbayan sa Sugbo ning panahon sa taas nga weekend sa Semana Santa.
Si Cebu Governor Gwendolyn Garcia personal nga nisusi sa mga terminal aron masiguro nga hapsay ang pagsulod ug pagbiyahe sa mga pasahero.
Si Rodenita Esgana, OIC Head of Operations sa duha ka mga terminal, nagkanayon nga 24 oras ang operasyon sa terminal ning panahuna aron dili malangay ang mga pasahero sa ilang biyahe.
Samtang, aduna usay di mominos 300 ka mga bus ang gipadagan aron may kasakyan ang mga pasahero nga mopauli sa tagsa-tagsa niini ka mga dapit ilabi na ang mga langyaw nga gustong mosuroy sa mga tourist site.
Sa kasamtangan, paspas ang pagsulod ug gawas sa mga mobiyaheay apan pasidaan sa management sa terminal nga ugaling wala nay importanteng tuyo dinhi sa siyudad mas maayong mosayo na sa pagpauli aron dili maabtan sa bul-og sa mga pasahero.
Subay niini, nanawagan si Esgana nga mosubay sa tanang lagda sa terminals ug sigurohon pagbantay ang ilang mga kagamitan aron kalikayan ang pagkawala.
Giabisuhan usab ang mga ginikanan nga kon ugaling dunay dala nga mga bata, dili na magdala og daghang bagahe aron maatiman ang mga kuyog niini.
Hinuon, aron mahatagan og seguridad ang mga pasahero, gipahibawo ni Police Col. Percival Zorill, hepe sa Cebu Provincial Police Office (CPPO). / ANV