Nangunay si outgoing Cebu City Mayor Raymond Alvin Garcia niadtong Biyernes, Mayo 30, 2025, pagpanghatag sa tag P1.5 milyones nga financial assistance matag usa sa 25 ka mga Sangguniang Kabataan (SK) chairperson aron suportahan ang mga proyekto alang sa kabatan-onan sa ilang tagsa-tagsa ka barangay.
Gipahigayon ang seremonyas sa Mayor’s Conference Room sa City Hall.
Kining lakang nagtumong sa pagpalig-on sa mga lider sa SK pagmugna ug pagpatuman sa mga programa nga direktang motubag sa panginahanglan sa mga batan-ong konstituente ug magpalambo sa ilang mga komunidad.
“Use this to fully implement projects for the youth. Prioritize initiatives that truly matter,” matod ni Garcia.
Dugang niya nga iyang gimando ang hingpit nga pagpagawas sa nahibiling pundo aron masiguro ang tukma sa panahon ug epektibo nga pagpatuman.
Lakip sa mga nakadawat mao si SK Chairperson Mele Mercado sa Barangay Sudlon 1, nga nipaambit nga ang tabang gamiton sa pagpalit og mga armchair alang sa mga estudyante sa pampublikong eskwelahan.
“This assistance will significantly help us respond to the needs of our students,” matod niya.
Sa Barangay Bonbon, si SK Chairperson John Dave Bacus niingon nga ang pundo gamiton sa pagtukod og mga learning hub ug pag-organisar og usa ka barangay-wide sports fest nga anaa sa mandatory programs ubos sa mandato sa SK.
Uban pang mga lider sa SK nga nakadawat sa tabang gikan sa mga Barangay sa Capitol Site, Caretta, Guba, Mabini, Mambaling, Pit-os, ug San Jose, ug uban pa. / JPS