Molupad na usab si Cebu City Mayor Raymond Alvin Garcia paingon sa Manila aron i-follow up ang exemption request sa siyudad sa Commission on Elections (Comelec) alang sa pagpagawas sa P35,000 nga Charter Day bonus.
Atol sa flag raising ceremony niadtong Lunes, Abril 7, 2025, si Garcia niingon nga wala pay tubag gikan sa Comelec sa hangyo sa dakbayan sa paghatag sa Charter Day bonus.
“I have not so good news ninyo. As of last week, we have not received a response yet... stand by lang mo, relax. It will come,” matod ni Garcia.
Nanghinaot ang mayor nga madawat niya ang tubag sa Comelec sa dili pa ang Semana Santa.
Samtang nagpaabot sa green light sa Comelec, si Garcia niingon nga ang opisina sa Finance ug Human Resource and Development nangandam na daan sa pagpagawas sa bonus.
Niadtong Marso 26, giaprobahan sa Cebu City Council ang P35,000 nga Charter Day bonus.
Una nang nangayo ang siyudad sa Comelec og exemption sa pipila ka serbisyo niini, apan wala maapil ang Charter Day bonus kay nagtuo sila nga mapasar kini sa dili pa magsugod ang campaign period sa Marso 28.
“Because there were really so many deliberations in the council, so many budget hearings, we’ve now been caught by the election ban,” ingon ni Garcia.
Ang P35,000 Charter Day bonus gitagana niadtong 1,300 ka mga regular nga empleyado ug 2,900 ka mga kaswal nga trabahante.
Ang 3 mil ka job order personnel sa siyudad gikatakda nga makadawat og P5,000 matag usa.
Ang Charter Day bonus kabahin sa P635 million supplemental budget no. 1 nga gihangyo ni Garcia sa City Council, diin P140 milyones niini alang sa road asphalting, P210 milyones alang sa pagtukod sa ikawalo hangtod ikapulo nga andana sa sa Cebu City Medical Center, P35 milyones alang sa maintenance ug operating expenses sa City Hall ug P100 milyones para sa livelihood program. / JJL, JPS